مخالفین جتنا چاہیں شور مچائیں، تصادم چاہتے ہیں نہ پہل کرینگے، افغان نائب وزیرخارجہ

کابل(مانیٹرنگ نیوز)افغانستان کے نائب وزیر خارجہ امیر خان متقی کا کہناہےکہ مخالفین جتنا چاہیں شور مچائیں،تصادم چاہتے ہیں نہ پہل کرینگے،اپنی سرزمین بھی کسی کیخلاف استعمال نہیں ہونے دینگے،جو ہمارے ساتھ انتشار کی سیاست کرے گا وہ تنہا رہ جائے گا۔

کابل میں وزارت تجارت کی تقریب سے خطاب کرتے ہوئے طالبان رہنما امیر خان متقی کا کہنا تھا کہ 50ممالک کا اتحاد ہمارے خلاف افغانستان میں داخل ہوا تھا، افغانستان میں بیرون ملک سے لڑنے کوئی جنگجو نہیں آیا، امن کا سہرا مقامی افراد کے سر جاتا ہے۔

افغانستان کی سرزمین کسی دوسرے ملک کے خلاف استعمال نہیں ہونے دیں گے، تصادم نہیں چاہتے اور نہ ہی اس میں پہل کریں گے، افغان عوام سے دوستی کے لیے کوئی ایک قدم بڑھائے تو طالبان حکومت دو قدم بڑھاتی ہے، نظام میں مشکلات ہیں لیکن اس کا محور عوام کی فلاح ہے، ایسے حالات بنائیں گے کہ کوئی ملک چھوڑ کر نہ جائے۔

انہوں نے کہا کہ ہم کسی کو وطن چھوڑنے کے لیے مجبور نہیں کریں گے، ہماری پالیسی عوام کو متحد کرنے کی ہے، ملک کی اقتصادی ترقی کی ذمہ داری تاجروں پر ہے، تاجروں کے لیے کوئی روک ٹوک ہے نہ رشوت کا بازار ہے، آج وزراء آپ کی پہنچ میں ہیں،ہم پر ابھی امتحان آئیں گے۔

بیرون ممالک کے ساتھ سیاسی تعلقات ماضی کے برعکس وسیع ہیں، مخالفین جتنا چاہیں شور مچالیں ہمیں اس سے کوئی فرق نہیں پڑتا،پنج شیر کے آخری معرکے کے بعد کہیں فائرنگ کی آواز بھی نہیں سنی گئی، مزار شریف میں ایک شخص اغوا ہوا تو تین گھنٹوں میں ہم نے ملزمان کو پکڑ لیا۔