ایشین چیمپئنز ہاکی، پاکستان کوآج روایتی حریف بھارت کا سامنا

کراچی(اسٹاف رپورٹر) ملائیشیا میں کھیلی جانے والے ایشین چیمپئنز ٹرافی ہاکی ٹور نامنٹ میں روایتی حریف پاکستان اور بھارت کے درمیان اہم میچ اتوار کو کھیلا جائے گا، فائنل کی راہ ہموار کرنے کیلئے دونوں ٹیموں کے لئے میچ بہت اہمیت کا حامل ہے۔ میچ پاکستانی وقت کے مطابق میچ تین بجے سہ پہر ہوگا۔ ایونٹ میں دونوں ٹیمیں ایک ایک میچ جیت چکی ہیں ،پاکستان نے کوریا کو اور بھارت نے جاپان کو شکست دی۔ فائنل کیلئے راہ ہموار کرنے کیلئے پاکستان کو بھارت کے خلاف لازمی کامیابی حاصل کرنا ہوگی کیونکہ پاکستان کودو میچز میں ایک کامیابی ملی ہے۔ پاکستان کو پہلے میچ میں ملائیشیا کے ہاتھوں ناکامی اٹھانا پڑی تھی، بھارت کے خلاف میچ کے بارے میں پاکستانی ٹیم کے منیجر حنیف خان نے کہا ہے کہ ہمارے کھلاڑیوں پر بھارت کے خلاف میچ کے حوالے سے کوئی دبائو نہیں ہے، جنوبی کوریا سے جیتنے کے بعد کھلاڑیوں کے اعتماد میں اضافہ ہوا ہے، قومی ٹیم کے کپتان فرید احمد نے کہا ہے کہ ہم اس میچ کو جیتنے کے لئے میدان میں جائیں گے، ہم پر کوئی دبائو نہیں ہوگا پوری کوشش ہوگی کہ حریف کے خلاف فتح حاصل کریں، بھارتی ہاکی ٹیم کے کپتان پی آر سری جیش نے کہاکہ روایتی حریف پاکستان سے ایشین چیمپئنز ٹرافی میچ کو پر سکون انداز میں کھیلیں گے، بھارتی ٹیم کی نگاہیں ٹائٹل جیتنے پر مرکوز ہیں ۔ ایک انٹرویو میں بھارتی کپتان نے کہا کہ دیگرٹیموں کی طرح پاکستان بھی اس ایونٹ میں ایک حریف ہے۔ انھوں نے کہا کہ ہمارے ملک کی جانب سے کھلاڑیوں پر دبا ئو آسکتا ہے، اس لیے میں انھیں مشورہ دوںگا کہ جو میچ یہاں ہورہا ہے اس پر توجہ دیں اور سوشل میڈیا سے دور رہیں۔ پاکستان اور بھارت کا میچ ہمیشہ ہی بہت زیادہ جذباتی کرنے والا ہوتا ہے، ہم اس میں اپنا 100فیصد کھیل پیش کرنا چاہتے ہیں ۔