کراچی (اسٹاف رپورٹر)گورنر سندھ محمد زبیر نے کہا ہے کہ اصلاحات اور وفاقی حکومت کی معاشی پالیسی کی ترتیب سے قومی معیشت پر مثبت اثرات مرتب ہورہے ہیں ۔ چھوٹی صنعتیں قومی معیشت میں اہم کردار ادا کررہی ہیں، مقامی افراد کو اسمال انڈسٹری سے روزگار کے وسیع مواقع دستیاب ہورہے ہیں ، حکومت اسمال انڈسٹریز کی فعالیت کے لئے بھرپور اقدامات اٹھارہی ہے ۔ ان خیالات کا اظہار انہوں نے گورنر ہاؤس میں اتحاد کاٹیج انڈسٹریز ایسوسی ایشن کے صدر حاجی صالحین تنولی کی قیادت میں 16 رکنی وفد سے ملاقات میں کیا ۔ وفد نے گورنر سندھ کو کا ٹیج انڈسٹریز کے مسائل ، ذرائع نقل و حمل میں مشکلات اور پانی کی قلت سمیت اہمیت کے حامل دیگر امور سے تفصیلی آگاہ کیا ۔گورنر سندھ نے کہا کہ وفاقی حکومت انفرااسٹرکچر کی ترقی و بحالی کے لئے جامع منصوبہ پر کام کررہی ہے با الخصوص صنعتی ایریاز اور اسمال انڈسٹریز کے علاقوں میں ترجیحی بنیادوں پر انفرااسٹرکچر کی ترقی و بحالی کے کام کو فوقیت دی جارہی ہے ۔ انہوں نے کہا کہ اسمال انڈسٹریز کی ضروریات کو ہر صورت پورا کیا جائے گا اس ضمن میں اتحاد کا ٹیج انڈسٹریز ایسوسی ایشن سے مشاورت معاون ثابت ہو گی۔