سندھ ہائیکورٹ نے سٹی اور بیکن ہاؤس اسکول کی فیسوں میں غیر قانونی اضافہ روکدیا

23 ستمبر ، 2017

کراچی (اسٹاف رپورٹر)سندھ ہائی کورٹ نےدو نجی اسکولوں (سٹی اور بیکن ہاؤس ) کی فیسوں میں غیر قانونی اضافے پر عمل درآمد روکنے کا حکم دیتے ہوئے محکمہ تعلیم اور اسکول انتظامیہ کو 27 ستمبر کے لئے نوٹس جاری کرد یئے ہیں۔تفصیلات کے مطابق سندھ ہائیکورٹ کے دو رکنی بینچ کے روبرو جمعے کو دو نجی اسکولوں (سٹی اور بیکن ہاؤس)کے مختلف کیمپس کے دو سو سے زائد طلباء کے والد ین کی اسکول انتظامیہ کی جانب سے فیسوں میں غیر قانونی اضافے کے خلاف دائر درخواستوں کی سماعت ہوئی۔

درخواست گزاروں کی جانب سے دائر کی گئی درخواستوں میں موقف اختیار کیا گیا ہے کہ سٹی اور بیکن ہاؤس اسکول کی انتظامیہ کی جانب سے طلبا کی فیسوں میں 5 فیصد سے زائد اضافہ کیا گیا ہے، فیسوں میں پانچ فیصد سے زائد اضافہ سندھ پرایئویٹ ایجوکیشنل انسٹی ٹیوشنز ریگولیشن کی خلاف ورزی ہے۔عدالت سے استدعا ہے کہ اس اضافے کو کا لعد م قرار دیا جائے، عدالت نے درخوا ست گذاروں کا موقف سننے کے بعد دونوں اسکولوں کی انتظا میہ کو طلبا کی فیسوں میں پانچ فیصد سے زائد اضافے پر عمل درآمد سے روک دیا ہے۔ عدالت نےمحکمہ تعلیم سندھ، بیکن ہاؤس اور سٹی اسکول انتظامیہ کو 27 ستمبر کے لئے نوٹسز جاری کرتے ہوئے جواب جمع کرانے کا حکم دے دیا ہے۔

تازہ ترین