کراچی سمیت سندھ کے شہروں کیلئے نوید لائے ہیں،فاروق ستار

21 اکتوبر ، 2017

کراچی(اسٹاف رپورٹر)متحدہ قومی موومنٹ پاکستان کے سربراہ ڈاکٹر محمد فاروق ستار نے کہا ہے کہ وزیر اعظم پاکستان سے ہماری ملاقات ہوئی ہے اور ہم وزیر اعظم پاکستان کی جانب سے کراچی، حیدرآباد، نوابشاہ سمیت سندھ کے دیگر شہروں کے عوام کیلئے واضح نوید لائے ہیں۔

وزیر اعظم نے یقین دہانی کرائی ہے کہ اکتوبر کے آخر تک کراچی پیکج پر کام شروع کردیا جائیگا۔ وہ جمعہ کو سینئر ڈپٹی کنونیر عامر خان، ڈپٹی کنونیرز کنورنوید جمیل، میئر کراچی وسیم اختر، اراکین رابطہ کمیٹی و دیگر کے ہمراہ بہادرت آباد میں واقع ایم کیو ایم پاکستان کے عارضی مرکز پر پریس کانفرنس سے خطاب کررہے تھے، ڈاکٹر فاروق ستار نے مزید بتایا کہ وزیر اعظم نے وزارت خزانہ کو ہدایت جاری کی ہے کہ کراچی کیلئے فنڈز فوری جاری کئے جائیں تاکہ کراچی پیکج پر رواں ماہ کے آخر میں کام شروع ہوسکے ۔انہوں نے کہا کہ کراچی کے عوام کے کیلئے یہ خوش خبری ہے کہ اکتوبر کے آخر تک کراچی کی تعمیر نو کے پیکج میں شامل منصوبوں کے فنڈز کا اجراء ہورہا ہے اور ان منصوبوں پر کام بھی شروع ہوجائے گا۔

اگلے ماہ نومبر میں حیدرآباد پیکج کے فنڈز کے اجراء کا بھی آغاز اور ان کے منصوبوں پر بھی عمل شروع ہورہا ہے۔

تازہ ترین