میرا مواخذہ جمہوریت کیلئے خطرناک ثابت ہوسکتا ہے ، فلپائنی چیف جسٹس

منیلا(جنگ نیوز) فلپائن کی چیف جسٹس کا کہنا ہے کہ ان کے خلاف مواخذے کی کارروائی جمہوریت کےلئے خطرناک ہوگی۔ غیرملکی ٹی وی کوانٹرویو دیتے ہوئے فلپائن کی چیف جسٹس ماریا لورڈیز سارینوں نے فلپائن کے صدر روڈریگو دوٹیرٹے اور انکے اتحادیوں کو خبردار کرتے ہوئے کہا ہے کہ ان کا مواخذہ جمہوریت کےلئے خطرناک ثابت ہوسکتا ہے۔ ان کا کہنا تھا کہ یہ مواخذہ صرف میری ذات تک محدود نہیں ہوگا بلکہ اس سے پوری جمہوریت متاثرہوگی۔ چیف جسٹس ماریا لورڈیز سارینوں نے فلپائنی صدر کی انسداد بدعنوانی مہم اور پولیس کے ہاتھوں ماورائے قانون ہلاکتوں پر تنقید کی۔ انہوں نے کہا کہ صدرنے مبینہ طورپر انسداد بدعنوانی مہم کے نام پر سرکاری اداروں کے نظم ضبط کو بالائے طاق رکھ دیا ہے۔ واضح رہے کہ فلپائن کے صدر نے چیف جسٹس پر کرپشن اور اثاثے چھپانے کے الزامات لگائے تھے جس پر ان کے خلاف مواخذے کی کارروائی شروع کی گئی ہے۔ فلپائن کی تاریخ میں پہلی بار سپریم کورٹ کے چیف جسٹس کے مواخذہ کی کارروائی کی جارہی ہے۔