جنوبی بھارت کے نامور اداکار کمل ہاسن نے موجودہ بھارتی حکومت کی قدامت پسند سوچ کی قلعی کھول دی۔
کمل ہاسن کا کہنا تھا کہ اس وقت بھارت میں ایسی فلمیں بنانے میں خطرہ ہے جن میں حکومت سے سوالات کیے گئے ہوں۔
کمل ہاسن اپنی نئی فلم انڈین 2: زیرو ٹالیرنس کے ٹریلر جاری کرنے کی تقریب کے دوران گفتگو کر رہے تھے۔
واضح رہے کہ کمل ہاسن کی یہ فلم انکی 1996 کی ہٹ فلم انڈین کا ہی سیکوئل ہے۔
تقریب کے دوران کمل نے کہا کہ کسی بھی ملک کا ہر فنکار اس ملک کا شہری بھی ہوتا ہے جسے اختیار ہے کہ وہ اشرافیہ سے سوال کرے۔
جب کمل ہاسن سے سوال کیا گیا کہ کیا آج کل ایسی فلمیں بنانے میں مشکل ہے جن میں حکومت سے سوال کیا گیا ہو؟ تو اس کے جواب میں نامور اداکار کا کہنا تھا کہ یہ مسائل تو برطانوی راج سے موجود ہیں۔
کمل ہاسن نے کہا کہ لوگ اس وقت بھی فلمیں بناتے تھے۔ اس بات سے قطع نظر کہ اسٹیبلشمنٹ کی اعلیٰ سطح پر کون ہے، ہم اس طرح کی فلمیں بنانا جاری رکھیں گے۔
انہوں نے مزید کہا کہ اس طرح کے سوالات پوچھنا صرف ایک فلم ساز کا ہی نہیں بلکہ ایک شہری کا بھی حق ہے۔
کمل ہاسن کا کہنا تھا کہ ہم فنکار یہ سمجھتے ہیں کہ ہم عوام کے ہی نمائندے ہیں، لہٰذا ہم نتیجہ سے بےخوف و خطر بےباک انداز میں بات کرتے ہیں۔ البتہ ایسی فلمیں بنانے میں خطرہ تو ہے کہ حکومت ناراض ہوسکتی ہے۔