وزیراعلیٰ خیبرپختونخوا علی امین گنڈا پور نے کہا ہے کہ اداروں سے درخواست ہے کہ وہ نیوٹرل ہو جائیں، لوگ یہ سمجھ رہے ہیں کہ ان کو حکومت میں لانے والے آپ ہیں۔
علی امین گنڈا پور نے پریس کانفرنس میں کہا کہ ادارے ان سے اپنے آپ کو لاتعلق کریں ورنا ان کے خلاف مزید نفرتیں پھیلیں گی۔
علی امین کا کہنا تھا کہ بجلی کے معاملے میں امیروں پر ہاتھ ڈالا جائے، غریب کتنی بجلی چوری کرلے گا، کے پی کا بجٹ ٹیکس فری اور فلاحی ہے ، عوام کو سولر پینلز فراہم کر رہے ہیں۔
انہوں نے کہا کہ اپیکس کمیٹی کے اجلاس میں تمام اداروں کی موجودگی میں چیزیں منظور ہوئی ہیں، اندر کچھ باہر کچھ یہ ان کا کردار ہے، ہم نے کبھی ایسا نہیں کیا۔
علی امین گنڈاپور نے کہا کہ ہم نے آئین کی پاسداری کی ہے آئین توڑنے والے یہ لوگ ہیں۔ دہشتگردی، روزگار اور معاشی حالات میں تباہی کا موازانہ کرلیں۔
ان کا مزید کہنا تھا کہ پاکستان کے خزانے میں کتنا پیسا تھا یہ سب ریکارڈ میں ہے، یہ نااہل ہیں یہ نکمے ہیں، یہ پنوتی اعظم ہیں جس چیز میں ہاتھ ڈالتے ہیں وہ تباہ ہوجاتی ہے۔