گوادر میں آج ہونے والے جلسے میں شرکت سے روکے جانے پر بلوچ یکجہتی کمیٹی کے کارکنوں کا مستونگ میں قومی شاہراہ پر دھرنا جاری ہے۔
بلوچ یکجہتی کمیٹی کی جانب سے آج گوادر میں جلسے کا اعلان کیا گیا تھا۔ جلسے میں شرکت سے روکے جانے پر بلوچ یکجہتی کمیٹی کا گزشتہ روز سے مستونگ قومی شاہراہ پر دھرنا جاری ہے۔
دھرنے کے باعث گوادر، تربت، پنجگور سمیت دیگر چھوٹے بڑے شہروں کو جانے والا ٹریفک اور پاک ایران سرحدی تجارت بھی متاثر ہے۔
دوسری جانب پولیس اور انتظامیہ نے مکران کوسٹل ہائی وے ایم 8 کو مختلف مقامات پر رکاوٹیں کھڑی کرکے بند کردیا۔
اُدھر بلوچ یکجہتی کمیٹی کی کال پر خاران، حب، واشک اور خضدار میں ہڑتال کی گئی جس کے باعث بیشتر کاروباری مراکز، پیٹرول پمپس اور دکانیں بند رہیں۔
گوادر میں انٹرنیٹ اور موبائل نیٹ ورک بھی مکمل بند ہے۔