گریٹر مانچسٹر/ بولٹن ( نمائندہ جنگ) بولٹن میوزیم ستمبر میں All About Mummification کے نام سے دلچسپ لیکچرز اور عملی ورکشاپس کا انعقاد کرنے جا رہا ہے جس میں شرکاء بولٹن کے مصری مجموعے کے مرکز میں ’’مصری ممی‘‘ کے بارے میں دریافت کر سکتے ہیں ۔ پروفیسر جان فلیچر اور ڈاکٹر اسٹیفن بکلی ورکشاپس فراہم کریں گے۔ ایگزیکٹو کابینہ کے ممبر برائے ثقافت، کونسلر ندیم ایوب نے بولٹن کے مصر کے بارے میں کہا کہ ’’بولٹن میوزیم کی مصریات میں بین الاقوامی ماہرین کے ساتھ کام کرنے اور اس دنیا کی معروف تحقیق کو عوام کے لیے قابل رسائی بنانے کی 140سالہ تاریخ ہے۔ اس سال، بولٹن میوزیم کی 140ویں سالگرہ اور گریٹر مانچسٹر ٹاؤن آف کلچر کے طور پر بولٹن کا سال میں ہم کچھ خاص کرنا چاہتے ہیں۔ شرکا ماہرین سے براہ راست سیکھتے ہوئے ’’ممی‘‘ کے حقیقی قدیم مواد کے ساتھ ہاتھ ملا سکتے ہیں۔