کراچی ( جنگ نیوز) پی ٹی آئی کے رہنما عاطف خان نے کہا ہے کہ ڈیڈ لاک توڑنے کا آسان طریقہ ہے کہ9مئی پر عدالتی کمیشن بنائیں۔ثابت ہو کہ9 مئی کا حکم بانی پی ٹی آئی نے دیا تو ہم معافی مانگنے پر تیار ہیں۔ ان خیالات کا اظہار انہوں نے جیوز نیوز کے پروگرام ’ آج شاہزیب خانزادہ کے ساتھ‘‘ میں گفتگو کرتےہوئے کیا۔ پروگرا م میں بنگالی صحافی میر ریحان مسعود نے بھی گفتگو کی اور بنگلہ دیش کی تازہ ترین صورتحال سے آگاہ کیا، انہوں نےبتایا کہ طلبا کسی صورت فوج یا اس کی حمایت یافتہ حکومت نہیں چاہتے۔ پولیس اور فوج سڑکوں پر نہیں ہیں، شہر میں خوف و ہراس ہے۔ ایسے میں کچھ طلبہ نے سڑکوں پر فرائض سنبھال لیے ہیں۔ میزبان شاہزیب خانزادہ کا تجزیہ جیو نیوز کے پروگرام ”آج شاہ زیب خانزادہ کے ساتھ “ میں میزبان شاہزیب خانزادہ نے اپنا تجزیہ پیش کرتے ہوئے کہا کہ بنگلہ دیش میں کل شیخ حسینہ واجد کی حکومت گرنے کے بعد پاکستان میں حکومت کو اپوزیشن یہ طعنے دے رہی ہے کہ وہ شیخ حسینہ واجد کے انجام سے سبق سیکھے۔ شیخ حسینہ واجدکی حکومت کے خاتمے کے بعد ابھی تک بنگلہ دیش میں اقتدار کی منتقلی کا عمل شروع ہی نہیں ہوسکا ہے۔سیاسی بحران وہیں پر کھڑا ہے فی الحال فوج ملک کا نظام حکومت چلا رہی ہے۔طلبا تحریک ایک کے بعد ایک اپنے مطالبات منوا رہی ہے۔ بنگلہ دیش میں فسادات اور توڑ پھوڑ کاسلسلہ بھی تھم نہیں سکا ہے۔آج مظاہرین نے بنگلہ دیش کے چیف جسٹس کے گھر پر دھاوا بولااور سامان لوٹ لیا۔ ڈھاکامیں بھارت کی جانب سے قائم کردہ اندرا گاندھی کلچرل سینٹر کو بھی نذر آتش کردیا گیا۔بنگلہ دیشی صدر نے سابق وزیراعظم خالدہ ضیاء کی سزا معاف کردی گئی ہے اور انہیں رہا کردیا گیا ہے۔ شیخ حسینہ واجدبرطانیہ میں سیاسی پناہ لینا چاہ رہی ہیں برطانوی حکام اس کے لئے تیار نہیں ہیں۔خبریں آرہی ہیں کہ انہیں بھارت میں کسی محفوظ مقام پررہائش دے دی گئی ہے۔اب ملک میں عبوری حکومت کے قیام کے لئے بھی بنگلہ دیش میں طلبا تحریک کے فیصلوں کو سب سے زیادہ اہمیت حاصل ہوگئی ہے۔اس وقت ملکی فوجی قیادت اور صدرطلبا تحریک کے نمائندوں کے ساتھ مذاکرات کررہے ہیں۔