اسلام آباد ہائی کورٹ نے صوبوں سے وفاق آنے والے اساتذہ کی واپسی روکنے کی درخواست مسترد کرتے ہوئے تحریری فیصلے میں کہا ہے کہ اگر وفاقی نظامت تعلیمات اساتذہ کو واپس ان کے اصل محکموں میں بھجوا رہی ہے تو عدالت نہیں روک سکتی۔
اسلام آباد ہائی کورٹ کے جسٹس میاں گل حسن اورنگزیب نے ڈیپوٹیشن پر وفاق آنے والے درجنوں اساتذہ کی اصل محکموں میں واپسی کے خلاف درخواستیں مسترد کرنے کا تحریری فیصلہ جاری کر دیا ہے ۔
عدالتی فیصلے میں کہا گیا ہے کہ اگر اساتذہ کو وفاقی نظامت تعلیمات واپس اصل محکمے بھیج رہی ہے تو عدالت نہیں روک سکتی، 15سال کی ڈیپوٹیشن کے بعد بھی دوبارہ اصل محکموں میں بھیجنے میں کوئی پابندی نہیں ہے، سالوں بعد بھی ڈیپوٹیشن والے اصل محکمے میں واپس جاسکتے ہیں۔
وفاقی نظامت تعلیمات میں ڈیپوٹیشن پر آنے والے اساتذہ ضم نہیں ہوئے، صوبوں سے ڈیپوٹیشن پر آنے والے اساتذہ کی نشستیں اصل محکموں میں موجود ہیں، عدالت نے اساتذہ کو اصل محکموں کو واپس بھیجنے پر حکم امتناع بھی خارج کردیا ہے۔