فرمان الہی
نماز کے اوقات
سندھ ہائی کورٹ نے سہراب گوٹھ سے اغواء ہونے والی لڑکی کی بازیابی میں پیش رفت نہ ہونے پر اظہارِ برہمی کیا ہے۔
عدالتِ عالیہ میں لڑکی سمیت 6 لاپتہ افراد کی بازیابی سے متعلق درخواستوں کی سماعت ہوئی۔
دورانِ سماعت لڑکی کی عدم بازیابی پر بوڑھی والدہ کمرۂ عدالت میں روتی رہی۔
درخواست گزار کا سماعت کے دوران عدالت میں کہنا تھا کہ لڑکی کو سہراب گوٹھ کے علاقے سے اغواء کیا گیا تھا، واقعے کا مقدمہ درج ہونے کے باوجود پولیس تاحال لڑکی کو بازیاب کرانے میں ناکام ہے۔
عدالت کی جانب سے لڑکی کی بازیابی میں پیش رفت نہ ہونے پر اظہارِ برہمی کرتے ہوئے کم عمر لڑکی، موسیٰ بن سجاد اور دیگر لاپتہ افراد کی بازیابی کے لیے اقدامات کرنے کا حکم دیا گیا۔
عدالت نے بغدادی اور پیر آباد کے علاقے سے لاپتہ ہونے والے محمد وقاص اور علی رشید کی بازیابی کی درخواستیں عدم پیروی کے باعث مسترد کر دیں۔
سماعت کے دوران پولیس نے ابراہیم حیدری کے علاقے سے لاپتہ ہونے والے شہری غلام محمد کے گھر واپس آ جانے کا بتایا۔
عدالت نے پولیس کی جانب سے رپورٹ جمع کروائے جانے کے بعد درخواست نمٹا دی۔
