ایران کا اسرائیل پر جوابی حملہ، 150 میزائل داغ دیے، 7 اسرائیلی زخمی

امریکا نے سلامتی کونسل میں بیان میں کہا ہے کہ اسرائیل کا ایران پر حملہ اپنے دفاع کے لیے ضروری ہے۔

امریکا نے کہا کہ ایران نے امریکی شہریوں، اڈوں یا دیگر بنیادی ڈھانچے کو نشانہ بنایا تو اس کے سنگین نتائج برآمد ہوں گے۔

سلامتی کونسل میں بیان میں امریکا کا کہنا تھا کہ ایران کبھی بھی جوہری ہتھیار حاصل نہ کرسکے اس کے لیے کوششیں جاری رکھیں گے۔

اقوام متحدہ میں پاکستان کے مستقل مندوب عاصم افتخار نے کہا ہے کہ پاکستان ایران پر اسرائیل کے غیرقانونی حملے کی مذمت کرتا ہے۔

عاصم افتخار کا کہنا تھا کہ ایران کو اقوام متحدہ کے چارٹر کے تحت اپنے دفاع کاحق حاصل ہے۔

اسرائیلی حملہ ایران کی خودمختاری اور علاقائی سالمیت کی خلاف ورزی ہے۔

ایران کا ایک گھنٹے کے اندر اسرائیل پر تیسرا حملہ جاری ہے، ایرانی سرکاری میڈیا کے مطابق ایران نے اسرائیل کے خلاف جوابی کارروائی کو ’’وعدہ صادق تھری‘‘ کا نام دیا ہے۔

ایرانی میڈیا نے دعویٰ کیا ہے کہ ایرانی دفاعی نظام نے 2 اسرائیلی طیارے مار گرائے ہیں جبکہ خاتون پائلٹ کو گرفتار کر لیا ہے۔

ایرانی نیوز ایجنسی تسنیم کے مطابق ایرانی دفاعی نظام نے اسرائیلی حکومت کے 2 لڑاکا طیاروں کو مار گرانے میں کامیابی حاصل کی ہے۔

مزید پڑھیں: 

ایران پر اسرائیل نے حملے کیے ہیں، تہران اور تبریز سمیت کئی شہروں پر بم باری میں ایران کی مسلح افواج کے سربراہ جنرل محمد باقری، پاس دارانِ انقلاب کے سربراہ میجر جنرل حسین سلامی اور ایرو اسپیس کے سربراہ امیر علی حاجی زادہ سمیت 20 سینئر فوجی کمانڈر شہید ہو گئے۔

اسرائیلی حملوں میں ایران کے بیلسٹک میزائل سسٹم کو بھی نشانہ بنایا گیا، نطنز کے جوہری ری ایکٹر اور دیگر جوہری تنصیبات پر حملے کیے گئے، نطنز کے جوہری ری ایکٹر سے دھوئیں کے گہرے بادل اٹھتے دیکھے گئے، حملوں میں 6 جوہری سائنس دان بھی شہید ہو گئے ۔

ایرانی ایٹمی توانائی کمیشن نے نطنز جوہری تنصیب کو نقصان پہنچنے کی تصدیق کر دی، تہران اور تبریز سمیت 12 صوبوں میں اسرائیلی حملوں میں 78 افراد جاں بحق اور 300 سے زائد زخمی ہوئے، اسرائیل نے ایران پر مزید حملوں کی دھمکی بھی دے دی۔

حزب اللّٰہ کا کہنا ہے کہ ایران پر حملوں کے ردِعمل میں حزب اللًّہ اسرائیل پر حملہ نہیں کرے گی، اسرائیلی حملوں کے بعد اتوار کو مسقط میں ہونے والے امریکا ایران مذاکرات منسوخ کردیے گئے۔

ایران نے اسرائیل پر جوابی حملہ کر دیا، 150 کے قریب میزائل داغ دیے۔

اسرائیلی میڈیا نے ایران کے حملے کی تصدیق کی ہے اور کہا ہے کہ دارالحکومت تل ابیب میں دھماکوں کی آواز سنی گئی ہے۔

مزید پڑھیں:

اسرائیلی وزیرِاعظم نتین یاہو نے کہا ہے کہ امریکا کی پشت پناہی کے بغیر ایران میں حملے ناگزیر تھے۔

اپنے تازہ بیان میں اسرائیلی وزیرِ اعظم نے کہا ہے کہ ایران کا ردعمل انتہائی سخت متوقع ہے، تہران کا حملہ ناگزیر ہے۔

مزید پڑھیں:

سربراہ عالمی ایٹمی توانائی ایجنسی (آئی اے ای اے) رافیل گروسی نے کہا ہے کہ اسرائیلی حملے کے بعد ایرانی ایٹمی تنصیبات سے تابکاری کا ثبوت نہیں ملا۔

میڈیا رپورٹ کے مطابق آئی اے ای اے نے کہا ہے کہ ایرانی حکام نے تصدیق کی ہے کہ ایرانی ایٹمی تنصیبات پر حملہ تو ہوا ہے لیکن وہاں سے تابکاری کا اب تک ثبوت نہں ملا ہے۔

مزید پڑھیں:

ایران نے اسرائیلی حملوں میں شہید فوجی عہدیداروں اور ایٹمی سائنسدانوں کے نام جاری کر دیے۔

تہران سے ایرانی میڈیا کے مطابق شہید فوجی عہدیداروں میں پاسداران انقلاب کے سربراہ میجر جنرل حسین سلامی، پاسداران کے سابق سربراہ محمد حسین افشردی عُرف محمد باقری، پاسداران انقلاب فضائی فورس کے سربراہ حاجی زادہ، پاسداران انقلاب خاتم الانبیاء ہیڈ کوارٹر کے سربراہ غلام علی رشید شامل ہیں۔

ایرانی جوہری توانائی پروگرام سے وابستہ شہید سائنسدانوں میں احمد رضا ذوالفقاری دریانی، فریدون عباسی، محمد مہدی تہرانچی، عبدالحمید مینوچھر اور امیر حسین فقہی شامل ہیں۔

امریکی محکمۂ خارجہ نے کہا ہے کہ امریکی شہری ایران کا سفر نہ کریں۔ جبکہ ایران میں موجود امریکی شہری فوراً ایران چھوڑ دیں۔

امریکی محکمہ خارجہ نے مزید کہا کہ ایران میں موجود امریکی شہری جو فوری طور پر نکل نہیں سکتے وہ محفوظ مقام پر رہیں۔