پیپلز پارٹی سندھ کے جنرل سیکریٹری اور سینیٹر وقار مہدی کا کہنا ہے کہ ایم کیو ایم عام انتخابات میں دھاندلی کے لیے فری ہینڈ چاہتی ہے۔
ایک بیان میںسینیٹر وقار مہدی نے کہا ہے کہ ایم کیو ایم کراچی کے عوام سے خوفزدہ ہے، کراچی کے عوام اس بار ایم کیو ایم کو اپنا ووٹ چرانے کی اجازت نہیں دیں گے۔
وقار مہدی کا کہنا ہے کہ ایم کیو ایم شکست کی شرمندگی سے بچنے کے لیے انتخابات سے بھاگنے کی تیاری کر رہی ہے، بشیر میمن کو بطور آئی جی پولیس دھاندلی کرانے کا تجربہ ہے۔
انہوں نے کہا کہ بشیر میمن نے آزاد کشمیر اور گلگت بلتستان میں دھاندلی کر کے ن لیگ کو جتوایا تھا، بشیر میمن تنخواہ حکومت سے لیتے تھے نوکری نواز شریف کی کرتے تھے۔
سندھ کے عوام نے ایم کیو ایم، فنکشنل لیگ، جے یو آئی اور جی ڈی اے کو ایک ہی تابوت میں بند کر دیا ہے، صفدر عباسی انتخابات میں شکست کے خوف سے در در کی ٹھوکریں کھا رہے ہیں۔