لاہور سمیت پنجاب بھر میں عیدالاضحیٰ کے موقع پر پولیس نے سیکیورٹی پلان ترتیب دے دیا۔
آئی جی پنجاب ڈاکٹر عثمان انور کے مطابق مساجد، امام بارگاہوں اور نمازِ عید کے اجتماعات کے لیے سیکیورٹی پلان تشکیل دیا گیا ہے جس کے تحت 26 ہزار 500 مساجد، امام بارگاہوں، 900 کھلے عید کے اجتماعات پر 40 ہزار اہلکار تعینات ہوں گے۔
انہوں نے بتایا ہے کہ لاہور میں نمازِ عید کے 5 ہزار سے زائد اجتماعات کی سیکیورٹی پر 6 ہزار اہلکار تعینات ہوں گے جبکہ 498 اسپیشل پولیس، 260 کیو آر ایف ٹیمیں بھی سیکیورٹی پر تعینات ہوں گی۔
ڈاکٹر عثمان انور کا کہنا ہے کہ 227 مویشی منڈیوں کی سیکیورٹی کے فرائض 3 ہزار اہلکار انجام دے رہے ہیں۔
انہوں نے پولیس حکام کو ہدایت کی ہے کہ قربانی کی کھالیں اکٹھی کرنے کے حوالے سے محکمۂ داخلہ کے ایس او پیز پر عمل درآمد کروایا جائے۔
آئی جی پنجاب نے ہدایت کی ہے کہ کالعدم تنظیموں اور فورتھ شیڈول میں شامل افراد کی نگرانی کا عمل مزید مؤثر بنایا جائے، مساجد اور امام بارگاہوں کی چھتوں پر اسنائپرز اور سادہ لباس میں کمانڈوز کو تعینات کیا جائے۔
انہوں نے عید کی تعطیلات کے دوران پارکوں اور تفریحی مقامات کی سیکیورٹی کے لیے اضافی نفری تعینات کرنے کا بھی حکم دیا ہے۔