جماعتِ اسلامی کے امیر سینیٹر سراج الحق کا کہنا ہے کہ کابینہ دیکھ کر یہی لگتاہے کہ اب بھی پیپلز پارٹی کی حکومت ہے،جن پر کرپشن کلچر عام کرنے اور قومی خزانہ لوٹنے کے الزامات ہیں، وہی پی ٹی آئی حکومت کی کابینہ میں بیٹھے ہیں۔
لاہور سے جاری بیان میں سراج الحق نے کہا کہ حالات نے ثابت کر دیا کہ موجودہ حکومت سابقہ حکومتوں کا ہی نیو ایڈیشن ہے ، پی ٹی آئی حکومت کو اب صاف دامن لوگوں کی حکومت کون تسلیم کرے گا ۔
ان کا کہناتھاکہ پی ٹی آئی کے ووٹرز اور سپورٹرز بھی حیران ہیں کہ ان کو کیا خواب دکھلائے گئےتھےاور ہو کیا رہاہے ،عوام پر گزرے حکومت کے 244 دنوں میں ہر دن دوسرے دن پر بھاری رہا۔
سراج الحق نے کہاکہ عوام کے مستردکردہ لوگوں کو کابینہ میں بٹھا کر حکومت کون سی تبدیلی لانا چاہتی ہے۔