چیئرمین پاک سرزمین پارٹی (پی ایس پی) مصطفیٰ کمال نے کہا ہے کہ عمران خان کی وفاقی حکومت فیل ہوگئی ،کراچی میں لاوا پک رہا ہے، لوگ ناراض ہیں، بہت پریشر ہے کہ اپنے حقوق چھینیں جائیں، متحدہ کے وزرا حکومت چھوڑنے کا اعلان کریں۔
نیب کورٹ کے باہر میڈیا سے گفتگو کرتے ہوئے چیئرمین پی ایس پی مصطفیٰ کمال پھٹ پڑے کہا کہ ایم کیو ایم ایجنٹ ہے، سوداگر ہے، مہاجر نام پر جھوٹی سیاست کرتے ہیں۔
انہوں نے کہا کہ کراچی کی 3 کروڑ آبادی کو مردم شماری میں کم دکھایاگیا ، ایم کیوایم پاکستان نے صرف اختلافی نوٹ دیا اور وفاقی کابینہ نے مردم شماری منظور کرلی۔
مصطفیٰ کمال نے کہا کہ پاک سرزمین پارٹی شہر کو لاوارث نہیں چھوڑے گی، جلد کسی لائحہ عمل کا اعلان کریں گے۔
ان کاکہنا تھا کہ مردم شماری میں ووٹر لسٹ میں لوگ زیادہ ہیں آبادی میں نہیں، ایم کیو ایم نے عوام کو بے وقوف بنانے کے لئے اختلافی نوٹ لکھ دیا، جب تک شہر کا چوکیدار تبدیل نہیں کیا جائے گا یہ شہر محفوظ نہیں رہ سکتا۔
چیئرمین پی ایس پی کا کہنا تھا کہ پاکستان اتنا مایوس کبھی نہیں رہا، پاکستانیوں کو نا حکومت سے امید ہے نا اپوزیشن سے، پی آئی اے ہیڈکوارٹر کو اسلام آباد منتقل کیا جارہا ہے۔
ان کا کہنا تھا کہ وفاقی کابینہ نے کراچی کی مردم شماری کو تسلیم کیا ہے، کراچی کے 70 لاکھ لوگ کم گنے گئے ہیں، چیف جسٹس پاکستان نے بھی ریمارکس دیئے کہ کراچی کی آبادی ساڑھے 3 کروڑ ہے، ووٹر لسٹ میں لوگ زیادہ ہیں آبادی میں نہیں۔
چیئرمین پی ایس پی نے کہا کہ نواز شریف اور مولانا فضل الرحمٰن کے خلاف نیب ریفرنسز بھیجے گئے،سابق میئر وسیم اختر کے خلاف کوئی ریفرنس نہیں آیا، یہ اربوں کی کرپشن کرکے آزاد گھوم رہا ہے۔
مصطفیٰ کمال کاکہنا تھا کہ چارسال میں شہر کو لوٹ لیا اس پر کیس نہیں بن رہا کیونکہ وہ حکومت کا حصہ ہیں، جب تک یہ نمائندے رہیں گے تمہارے بچوں کوفلاح نہیں مل سکتی۔
ان کا حکومت سے کہنا تھا کہ آپ ہمیں پینے کا پانی نہیں دے رہے، سیوریج کا نظام نہیں دے رہے، آپ ہمیں ٹرانسپورٹ نہیں دے رہے، نوکری نہیں دے رہے، جبکہ سب سے مہنگی بجلی اور سب سے مہنگی گیس دے رہے ہیں۔
مصطفیٰ کمال نے کہا کہ جو اس شہر کےخلاف سازش کررہا ہے وہ ملک کے خلاف سازش کررہا ہے، سب ملک کا خون چوس رہے ہیں، سب لٹیرے ہیں۔