کسی بھی شعبہ میں کامیابی کے لیے کچھ بنیادی خصوصیات اور صلاحیتوں کا ہونا ضروری ہوتا ہے۔ اس سلسلے میں کچھ عرصہ قبل امریکا میں صفِ اوّل کے 104کاروباری سربراہان سے ایک سروے کیا گیا۔ سروے میں ایک باصلاحیت اور مؤثر ملازم کی 20 خصوصیات درج کی گئی تھیں اور ان سے پوچھا گیا تھا کہ وہ ’سب سے اہم‘ خصوصیات کا انتخاب کریں۔ 86فی صد سی ای اوز نے دو خصوصیات کو سرِفہرست رکھا، جو ان کے خیال میں ایک ملازم کو پیشہ ورانہ زندگی میںکامیابی دِلانے اور آگے بڑھنے میں اہم ترین کردار ادا کرتی ہیں۔ وہ خصوصیات تھیں:
1۔ ترجیحات کا تعین کرنے، مفیدسے غیر مفید کو علیحدہ کرنے کی صلاحیت
2۔ ایک کام کو جلد از جلد پایہ تکمیل تک پہنچانے کی صلاحیت
اگر آپ یہ معلوم کرنا چاہتے ہیں کہ کیریئر میں آگے بڑھنے کا سب سے اہم راز کیا ہے تو وہ ہے: آپ اہم ترین کام جلد از جلد اور ٹھیک طریقے سے پایہ تکمیل تک پہنچانے کی ساکھ کے حامل بنیں۔ اگر آپ شعبہ آرکیٹیکچر سے وابستہ ہیں تو آپ کے لیے بھی یہی بات مؤثر ہے۔
برانڈن ہوبارڈ ایک معروف امریکی محقق ہیں، وہ ایک جگہ لکھتے ہیں کہ نوکری کے لیے درخواست تیار کرتے وقت اپنے کوائف میں اپنی صلاحیتوں اور ممکنہ نوکری میں ذمہ داریوں کے اہم ترین نکات پر بھرپور توجہ دیں اور ان میں تعلق قائم کریں۔ اگر آپ ایک آرکیٹیکچر آفس میں ملازمت کرتے ہیں تو وہاں بھی اس قانون کو لاگو کریں: ’جو اہم ہے اسی پر توجہ مرکوز رکھیں‘۔ باقی چیزیں خود بخود ہوتی چلی جائیںگی۔
کردار بدلیں
آپ کے لیے ایک مددگار مشق یہ ہوسکتی ہے کہ خود کو اپنے موجودہ سپروائزر کے کردار میں دیکھیں۔ آپ کو ایک پروجیکٹ کا آرکیٹیکچر مکمل کرنا ہے۔ اس کے لیے آپ کے پاس 2 آرکیٹیکٹس کی ٹیم ہے۔ دونوں کا تجربہ اور صلاحیتیں کم و بیش ایک جیسی ہیں، تاہم دونوں اس پروجیکٹ کو مختلف نوعیت سے دیکھتے ہیں۔
ایک آرکیٹیکٹ، صبح آتے ہی اس پروجیکٹ کے لیے ایک مخصوص ورژن ڈیزائن کرتا ہے، تاہم اسے ڈیزائن سوفٹ ویئر میں نیا’پلگ اِن‘ استعمال کرنے میں مشکلات کا سامنا ہے اور باقی پورا دن وہ یہ تعین کرنے میں گزار دیتا ہے کہ پلگ اِن کیوں کام نہیں کررہا۔ دوسرا آرکیٹیکٹ، ڈرائنگ کی موجودہ صورتحال کا جائزہ لیتا ہے، پہلے پیچیدہ مراحل مکمل کرنے کو ترجیح دیتا ہے اور طے کرتا ہے کہ کس طرح ایک مختلف ڈیزائن سوفٹ ویئر کے ذریعےاس پروجیکٹ کو ایک مہینے کے بجائے پندرہ دن میں مکمل کیا جاسکتا ہے۔
آپ اپنی ٹیم میں کسے رکھنا پسند کریں گے؟
یقیناً، آپ اپنی ٹیم کے ساتھ میٹنگ کریںگے اور پہلے آرکیٹیکٹکو ایک پلگ اِن پر اتنا زیادہ وقت برباد کرنے سے روکیںگے اور دونوں کے لیے ’قابلِ عمل‘ اہداف اور راستے کا انتخاب کریںگے۔
مسئلہ حل کرنے والے بنیں
آرکیٹیکچر بنیادی طور پر مسائل کا حل (Problem Solving) نکالنے والا پیشہ ہے۔ کوئی دو عمارتیں ایک جیسی نہیں ہوتیں، اس لیے ہر آرکیٹیکچر کی پیچیدگیوں کو سمجھنا اور اس کے لیے حل نکالنا آپ کی اہم خصوصیت ہونی چاہیے۔ آپ نے اکثر منیجرز کو یہ کہتے سنا ہوگا، ’میں ان دو کے ساتھ وہ کام انجام دے سکتا ہوں جو دیگر پانچ کے ساتھ بھی ممکن نہیں‘۔ اس کی وجہ یہ ہے کہ وہ دو لوگ جانتے ہیںکہ مسائل کو حل کرتے ہوئے کام کو کس طرح مؤثر انداز میں اور بروقت مکمل کرنا ہے۔
پروجیکٹپر کام کا آغاز
ایک پروجیکٹ پر کام شروع کرنے سے پہلے ایک لمحہ رُک کر یہ سمجھ لیںکہ اس میں کیا پیچیدگیاں ہیں۔ اس طرح آپ ممکنہ حل اور راستے کا انتخاب کرپائیںگے۔
ٹیم میں اور کون ہے؟
گروپ اسٹرکچر کو سمجھیں۔ ایک بڑے دفتر میں یہ سمجھنا ضروری ہے کہ کون کیا کررہا ہے، تاکہ ایسا نہ ہو کہ ایک ہی کام کو دو لوگ کرنے لگ جائیں۔
ٹیم میں شامل آرکیٹیکٹس کی صلاحیتیں کیا ہیں؟
اپنی ٹیم میں شامل دیگر آرکیٹیکٹس کی صلاحیتوں کے بارے میں جانیں، شاید اس طرحآپ کسی ساتھی آرکیٹیکٹ کے ساتھ جاب رول بدل کر وہ کام کرسکیں جہاں آپ بہتر نتائج دے سکتے ہوں اور وہ آپ کے کردار میں بہتر نتائج دینے کی صلاحیت رکھتا ہو۔
پروجیکٹ کس مرحلے میں ہے؟
بعض اوقات ایسا بھی ہوتا ہے کہ ایک پروجیکٹ پہلے ہی جاری ہوتا ہے اور آپ کچھ دیر بعد اس کا حصہ بنتے ہیں۔ ایسے میں آپ کے لیے یہ جاننا بنیادی ضرورت کا حامل ہوتا ہے کہ پروجیکٹ پر اب تک کس حد تک کام مکمل کیا جاچکا ہے۔
کیا اور کب کرنا ہے؟
ڈیڈ لائنز اہم ہوتی ہیں۔ تمام اہم سنگِ میل کی تکمیل کی تاریخیں اپنے کیلنڈر پر درج کریں اور انہیں گاہے بگاہے پیشرفت کے مطابق اَپ ڈیٹ کرتے رہیں۔
ترجیحات کیا ہیں؟
غالباً یہ سب سے اہم سوال ہے۔ اہم ترین سے کم اہم کی فہرست بنائیں اور اسی ترجیح میں کام انجام دیتے جائیں۔ جیسے ہی ایک سنگِ میل عبور ہو اسے فہرست میں سے خارج کردیں یا اس پر نشان لگادیں۔ اہم ترین کام کو انجام دینے کے بعد اپنی ترجیحات کی فہرست کا ازسرِ نو جائزہ لیں، وہ کون سے نئے کام اس دوران سامنے آئے ہیں جو اہم ہوسکتے ہیں؟
کون سے پُرانے کام ایسے ہیں جو اب اپنی اہمیت کھو چکے ہیں یا ترجیحات کی فہرست میں ان کی اہمیت مزید بڑھ گئی ہے، اس کے مطابق اپنی فہرست کو ازسرِ نو ترتیب دیں اور ایک چھوٹے سے وقفے کے بعد پھر سے تروتازہ ہوکر کام کا آغاز کریں۔