سخاوت علی جوھرؔ
میرے گلشن میں بھی یارو جو کوئی باغ باں ہوتا
مہکتا خوش بوؤں سے پھر مِرا یہ آشیاں ہوتا
نہ ہوتے ہر زباں پر میری ناکامی کے یوں چرچے
اگر تُو ہی میری اِس زندگی کا رازداں ہوتا
نہ جاتا سر جُھکانے غیر کی چوکھٹ پہ مَیں اپنا
اگر نظروں میں میری آپ کا یہ آستاں ہوتا
رہی ہے زندگی میں حسرتِ ناکام ہی پنہاں
کبھی اے کاش! مجھ پر بھی جو کوئی مہرباں ہوتا
مقدّر نہ کبھی بنتی میری یہ وحشتِ تنہائی
نہ گرتی بجلیاں مجھ پر، نہ اُجڑا آشیاں ہوتا
کرکے تعریف اُس نے زندگی برباد کر ڈالی مِری
نہ کرتا وہ میری تعریف تو احساں ہوتا
قربتیں اتنی نہ بڑھتیں کسی صُورت اپنی
ذرّہ بھر بھی وہ اگرہم سے بدگماں ہوتا
نہ پھرتا دَر بدر اس طرح جوھرؔ کبھی یارو
بَھری بستی میں گر،میرا بھی کوئی پاسباں ہوتا