وزیراعظم عمران خان کا اسمبلی سے استعفے دینے کے آپشن پر غور

اسلام آ باد ( رانا غلام قادر ) معلوم ہوا ہے کہ تحریک عدم اعتماد کی کامیابی کی صورت میں وزیر اعظم عمران خان اسمبلیوں سے استعفے دینے کا کارڈ استعمال کرسکتے ہیں جس سے نئی حکومت بحران سے دوچار ہوجائے گی۔

 ذرائع کے مطابق اس وقت قومی اسمبلی میں پی ٹی آئی کے ارکان کی تعداد155 ہے۔ ممبران کی کل تعداد342ہے ۔

 ذرائع کے مطابق وزیر اعظم اس تجویز پر سنجیدگی سے غور کر رہے ہیں کہ تحریک عدم اعتماد میں ناکامی کی صورت میں پی ٹی آئی کے تمام ممبران اسمبلی مستعفی ہو جائیں۔ 

اگر پی ٹی آئی اور ان کے اتحادی جو اگرچہ اب تعداد میں کم رہ گئے ہیں اگر قومی اسمبلی سے مستعفی ہو جائیں تو نئی حکومت کا چلنامشکل ہوجا ئے گا۔ اتنی تعداد میں ضمنی الیکشن کرانا بھی مشکل ہوگا۔ 

یہی مشق پنجاب اور خیبر پختونخوا میں بھی بیک وقت کی جا ئے گی۔ وزیر اعظم یہ سمجھتے ہیں کہ فوری طور پر الیکشن میں جانا ان کیلئے سود مندثابت ہوگا۔ 

خیبر پختونخوا کے بلدیاتی الیکشن کے حالیہ نتائج ان کیلئے حوصلہ افزا ہیں۔ عمران خان کو انتخابی مہم کیلئے امریکہ مخالف بیانیہ مل گیا ہے۔

 ذرا ئع کے مطابق پی ٹی آئی کے منحرف ممبران اسمبلی استعفے نہیں دیں گے۔