سعودیہ نے اسٹیٹ بینک میں موجود 3 ارب ڈالر کی واپسی کی مدت میں توسیع کر دی

سعودی عرب نے اسٹیٹ بینک میں موجود 3 ارب ڈالر کی واپسی کی مدت میں توسیع کر دی ہے۔

یہ بات وزیرِ اعظم میاں محمد شہباز شریف کے دورۂ سعودی عرب کے جاری کیے گئے مشترکہ اعلامیے میں کہی گئی ہے۔

اعلامیے کے مطابق پاک سعودی سپریم کوآرڈی نیشن کونسل کے تحت مختلف امور پر دو طرفہ تعلقات کے فروغ پر اتفاق ہوا ہے۔

اعلامیے میں کہا گیا ہے کہ سعودی عرب نے پاکستان کے ساتھ معاشی تعاون جاری رکھنے کا اعادہ کیا ہے۔

وزیرِ اعظم شہباز شریف کی روضۂ رسول ﷺ پر دوبارہ حاضری

وزیرِ اعظم شہباز شریف نے مسجد نبوی ؐمیں روضۂ رسول ﷺ پر دوبارہ حاضری دی ہے۔

مشترکہ اعلامیے کے مطابق دونوں ملکوں کے درمیان تجارت کو فروغ دینے پر اتفاق ہوا ہے۔

دونوں ملکوں کے مشترکہ اعلامیے میں کہا گیا ہے کہ پاکستان کی جانب سے سعودی عرب کے بھرپور تعاون کو سراہا گیا۔

مشترکہ اعلامیے کے مطابق دونوں ملکوں نے نجی شعبے، انڈسٹریز اور کان کنی کے شعبے میں تعاون پر بھی اتفاق کیا ہے۔

اعلامیے کے مطابق پاک سعودی بزنس کونسل کے اجلاس نے سرمایہ کاری کو فروغ دینے کا فیصلہ کیا ہے، جس کے تحت زراعت اور خوراک کے شعبوں میں نجی شعبے کی حوصلہ افزائی کی جائے گی۔

مشترکہ اعلامیے کے مطابق دونوں ملکوں نے ابلاغِ عامہ کے شعبے میں تعاون بڑھانے کا فیصلہ کیا ہے، پاکستان کی جانب سے سعودی عرب کے ماحولیاتی وژن کو سراہا گیا۔

اعلامیے میں کہا گیا ہے کہ دونوں ملکوں نے ماحولیاتی تبدیلی کے چیلنجز سے نبرد آزما ہونے کے لیے نئے معاہدے کرنے پر اتفاق کیا ہے۔

مشترکہ اعلامیے کے مطابق دونوں ملکوں نے دہشت گردی و انتہاپسندی کے خاتمے کے لیے تعاون جاری رکھنے پر بھی اتفاق کیا ہے۔

پاک سعودیہ مشترکہ اعلامیے کے مطابق پاکستان کی معاشی مدد کے طور پر پیٹرولیم کی فنانسنگ بڑھانے اور تجارت کو فروغ دینے پر بھی اتفاق ہوا۔

مشترکہ اعلامیے میں کہا گیا ہے کہ پاکستان کی جانب سے سعودی عرب کے بھرپور تعاون کو سراہا گیا، دونوں ملکوں نے نجی شعبے میں بھی تعاون پر اتفاق کیا۔

اعلامیے کے مطابق اقتصادی شعبے میں دونوں ملکوں کے درمیان تعاون کی نئی راہیں تلاش کی جائیں گی، پاکستان نے سعودی گرین اور مڈل ایسٹ گرین منصوبوں میں تعاون کی پیشکش کی ہے۔

مشترکہ اعلامیے میں دونوں ممالک نے سلامتی، استحکام اور اتحاد کے فروغ کے عزم کا اعادہ کیا ہے، خطے کے ممالک کی خود مختاری اور جغرافیائی سالمیت کی حمایت جاری رکھنے کا عزم بھی ظاہر کیا ہے۔

اعلامیے میں تشدد، انتہا پسندی و دہشت گردی کے خاتمے کے لیے جدوجہد جاری رکھنے پر اتفاق کیا گیا، دونوں ممالک نے سیاسی تنازعات کے حل کو ترجیح دینے کا عزم بھی دہرایا ہے۔

مشترکہ اعلامیے کے مطابق پاکستان اور سعودی عرب نے فلسطین کاز پر ہونے والی پیش رفت پر بھی بات چیت کی، فلسطین کا اسٹیٹس اور عرب اقوام میں اس کا اسلامی تشخص قائم رکھنے پر زور دیا۔

اعلامیے میں بتایا گیا ہے کہ پاکستان اور سعودی عرب نے شام کے بحران کا حل عوام کی خواہشات کے مطابق تلاش کرنے اور عراق کے استحکام اور جغرافیائی سالمیت کی حمایت پر بھی زور دیا۔

مشترکہ اعلامیے میں کہا گیا ہے کہ پاکستان اور سعودی عرب نے افغانستان کی سر زمین دہشت گرد گروہوں سے محفوظ بنانے پر زور دیا ہے، دونوں ملکوں کے درمیان افغان عوام کو امداد کی فراہمی اور اس ضمن میں حمایت جاری رکھنے پر اتفاق بھی ہوا ہے۔

اعلامیے میں یہ بھی کہا گیا ہے کہ وزیرِ اعظم شہباز شریف نے میزبانی پر شاہ سلمان بن عبدالعزیز کا شکریہ ادا کیا ہے۔