فضلِ ربانی

ہر طرف سے ہم پہ قدرت کی عطا

نعمتوں کا سلسلہ در سلسلہ

بحر کی لہروں میں دیکھی سرکشی

کیا سمندر ہے عجب وہ حُسن کا

قدرتی جھرنوں میں پائی زندگی

آب شاروں کا ترنّم مرحبا

بہتے دریاؤں پہ ڈالی جب نظر

دل یکایک بس خوشی سے کِھل اٹھا

دیکھ ڈالے ہم نے ریگستان بھی

جن پہ قبضہ ہے مکمّل دھوپ کا

دیکھ لیجے ہاں جو نخلستان ہیں

وہ شجر سے آب سے ہیں پُرفضا

اِک طرف میدان ہی میدان ہیں

خوش نما سبزے کہیں وہ جا بجا

ہاں یہاں جاری ہیں چشمے مستقل

اور وہ بھی دل فریب و دل رُبا

کوہ ایسے جو فلک سے جا ملیں

خود بلندی کا جہاں سر جھک گیا

چار موسم، سبزیاں، سارے ثمر

خُلد کی گویا ہے سب آب و ہوا

ڈالیاں پھولوں سے دیکھی ہیں لدی

نعمتیں از ابتدا تا انتہا

پھر بھی ہم محروم ہیں مقروض ہیں

یاالٰہی! کیا ہے آخر ماجرا؟

پھر بھی ہم رنجور ہیں مایوس ہیں

مل رہی ہے کس لیے پیہم سزا؟

چار سُو بحران ہی بحران ہیں

جس کو دیکھو کہہ رہا ہے برملا

بحر کی لہریں تموّج سے ہیں پُر

لو بھنور میں وہ سفینہ آچلا

سمت ہے شاید، نہ اب منزل کوئی

اب نہ رہبر ہیں، نہ ہیں اب رہنما

جو دیا رب نے قمرؔ بس شُکر ہے

نعمتوں کا ذکر ہے اور مرثیہ