نئی حکومت کو درپیش چیلنجز

عام انتخابات کے انعقا د کے بعد حکومت سازی کے لیے سیاسی جوڑ توڑ کا عمل ماضی کی طرح اپنے جوبن اور عروج پر ہے سیاسی جماعتیں ایک دوسرے کے ساتھ مذاکرات اوروعدے وعید کرکے حکومت بننے کی صورت میں عہدوں کی تقسیم کے تناسب اور طریقہ کار کو حتمی شکل دینے جارہی ہیں، کسی بھی سیاسی جماعت کو واضح اور مطلوبہ برتری نہ ملنے کی وجہ سے اس بات کے قوی امکانات ہیں کہ کم ازکم وفاق میں بننے والی حکومت میں ایک سے زائد جماعتیں شریک ہوں گی، سیاسی مکالمے اور مذاکرات کے نتیجے میں وفاق اور صوبوں میں حکومتیں جلد قائم ہو جائیں گی حالیہ سیاسی منظر نامے اور ماحول میں ایک اہم ترین پہلو بالکل واضح ہے کہ عام انتخابات میں عوام کی بڑی تعداد نے اپنے ووٹ کا حق استعمال کیا ہے، شہروں اور دیہات میں عورتوں، مردوں، نوجوانوں اور بوڑھوں نے بڑھ چڑھ کر انتخابی عمل میں حصہ لے کر ایک طرف سیاسی نظام پر اپنے اعتماد کا اظہار کیا ہے اور دوسری طرف سیاسی جماعتوں پر ملک اور قوم کو درپیش مسائل کو حل کرنے کی بھاری بھرکم ذمہ داری بھی سونپ دی ہے یہ بات ایک طے شدہ اور خوش آئند حقیقت ہے کہ عوام کے سیاسی شعور ، فکر ، تدبُر اور فہم و فراست میں بے حد اضافہ ہوچکا ہے اب عوام کو سیاسی جماعتوں کی کارکردگی، وعدوں اور دعوئوں کو پرکھنے اور جانچنے کا مکمل شعور اور ادراک ہے اس عوامی شعور کی بیداری اور پختگی میں بلاشبہ میڈیا اور بالخصوص سوشل میڈیا کا خاصا کردار ہے نئی بننے والی وفاقی حکومت کو سیاسی محاذ سے ہٹ کر کئی سنگین اور پیچیدہ چیلنجز درپیش ہو ں گے یہی وجہ ہے کہ بعض سیاسی حلقوں کی جانب سے حکومت سازی کے عمل کے بعد عوامی توقعات پر پورا نہ اُتر سکنے کے خدشات کا بھی بَر ملا اظہار ہو رہا ہے وفاقی حکومت جو جماعت بھی بنائے گی اسکا سب سے پہلا کٹھن ترین امتحان تباہ حال ملکی معیشت کی بحالی ہوگا اس امتحانی پرچہ میں ماضی میں بننے والی حکومتیں مکمل طور پر ناکام رہی ہیں کوئی بھی حکومت عوام کو درپیش بد ترین معاشی مشکلات اور مہنگائی کے چُنگل سے نکالنے میں کامیاب نہیں ہو پائی، اب تو ملکی معاشی بحران دن بدن بد تر اور سنگین تر ہوتا چلا جا رہا ہے ملک پر پہاڑ کی مانند قرضوں کا بوجھ کم ہونے کی کوئی صورت قطعاََ نظر نہیں آرہی اور یہی بوجھ ملکی معیشت کو شدید متاثر کر رہا ہے مہنگائی کے خوفناک طوفان نے پوری قوم کو اپنی لپیٹ میں لے رکھا ہے بے روزگاری ہر گھر میں بسیرا کیے ہوئے ہے قومی صنعتوں کی تباہ حالی ہمارے سامنے ہے ہماری ہی ناقص اور فرسودہ معاشی اور ٹیکس پالیسیوں کا نتیجہ ہے کہ ہماری صنعتیں دوسرے ممالک میں منتقل ہوتے جا رہی ہیں تمام بڑے قومی ادارے بدقسمتی سے خسارے میں جارہے ہیں ہماری زراعت بھی بدترین صورتحال سے دوچار ہے زرعی ملک ہونے کے باوجود اگر تمام طرح کی اجناس امپورٹ ہو رہی ہیں تو اسکا مطلب بالکل واضح ہے کہ زراعت کا شعبہ ڈوب چکا ہے زرخیز کھیت کھلیانوں اورسر سبز و شاداب رقبوں پر ہائوسنگ سوسائٹیوں کا قائم ہوجانا ہماری غفلت اور لا پروائی کا واضح ثبوت ہے ملک میں ہر جانب بد عنوانی اور لوٹ کھسوٹ کا بازار خوب گرم ہے سرکاری اداروں میں بھی قدم بہ قدم سیاست کی فضا اور ماحول قائم ہے سرکاری تعیناتیوں میں سیاسی عمل دخل نے میرٹ کا گلا گھونٹ کررکھ دیا ہے بلاشبہ اب نئی حکومت کو اپنے قدم پھو نک پھونک کر رکھنے ہوں گے اور اس بات کو ذہن نشین رکھنا ہوگا کہ اقتدار کسی بھی طور پھولوں کا بسترثابت نہیں ہوگابدترین معاشی مشکلات کے بھنور سے نکلنے کیلئے گھِسے پھِٹے وعدے اور روایتی بیانات اور اعلانات ہر گز نہیں چلیں گے بلکہ ایک واضح، دو ٹوک اور قابل عمل موثر معاشی پلان دینا ہوگا جس میں سرِفہرست ہر طرح کے سرکاری اخراجات میں نمایاں کمی کرنا ہوگی ذاتی ، جماعتی اور سیاسی مفاد کی خاطر سرکاری خزانے کا منہ کھولنے کا کلچر ہمیشہ ہمیشہ کے لیے ختم کردینے کا یہ بہترین وقت ہے غیر ضروری اور من پسند بھرتیوں کی ماضی کی روش ختم کئے بغیر ملک کی خدمت کرنے کا دعویٰ کھوکھلا اور بے معنی ثابت ہوگا یہ بات طے شدہ ہے کہ کوئی سڑک یا پُل بناکر اُسکا ڈھنڈورا پیٹنے، افتتاح کرکے تختیاں لگانے اور سیاسی فائدے حاصل کرنے کا دور اب ختم ہوچکا ہے، نئی حکومت کو یہ بھی ذہن نشین رکھنا ہوگا کہ اس ملک میں اللہ تعالیٰ کی دی ہوئی ہر چیز موجود ہے یہاں سمندر، دریا، زرعی زمینیں ، ہر طرح کا موسم، پہاڑ، بیش قیمت معدنیات اور بیشمار قدرتی وسائل موجود ہیں مگر صد افسوس کہ ہم پھر بھی قرضوں کے بوجھ تلے دبے ہوئے ہیں اسکی واحد وجہ ہماری ناقص پالیسیاں، نااہلی، کوتاہی اور غفلت ہے، امُورِ حکومت بہتر انداز میں چلانے کیلئے ترقی یافتہ اور کامیاب ممالک سے سیکھنا اور استفادہ کرنا بہت ضروری ہے ایسے درجنوں ممالک ہیں کہ جو ہم سے بھی برُے حالات سے دو چار تھے مگر ہمارے دیکھتے ہی دیکھتے وہ ہم سے بہت آگے نکل چکے ہیں روایتی طرزِ حکومت کی بجائے دو چار اچھے کامیاب غیر ملکی ماڈلز کوا پنا کر گورننس کو بہتر بنایا جاسکتا ہے۔