فرمان الہی
نماز کے اوقات
فلسطین کی مزاحمتی تنظیم حماس کے سیاسی رہنما اسماعیل ہنیہ شہید کی بہو ایناس ہنیہ نے ان کی شہید پوتیوں کی یادگار تصاویر کے ساتھ ایک درد بھرا پیغام شیئر کردیا۔
فوٹوز اینڈ ویڈیوز شیئرنگ ایپ انسٹاگرام پر شیئر کی گئی تصاویر میں ایناس ہنیہ نے دل کو چھولینے والی ایک تحریر کے ساتھ شہید امل اور مونا کی متعدد یادگار اور خوبصورت تصاویر شیئر کی ہیں۔
11 اپریل 2024 کو عید کے دن حماس کے سیاسی رہنما اسماعیل ہنیہ کے 3 بیٹے اور 4 پوتے پوتیاں اسرائیلی حملے میں شہید ہوگئے تھے۔
اسماعیل ہنیہ کے بیٹے عید کے پہلے دن خاندان سے ملنے جا رہے تھے کہ اس دوران اسرائیلی فوج کی جانب سے کیے گئے فضائی حملے میں ان کے 3 بیٹے، حاضم، عامر اور محمد، جبکہ پوتے اور پوتیاں، جن میں مونا، امل، خالد اور رضان بھی شہادت کے مرتبے پر فائز ہوئے تھے۔
اسماعیل ہنیہ شہید کی بہو ایناس ہنیہ نے اپنے پیغام میں کہا کہ میں دعا کر رہی تھی کہ اللّٰہ مجھے جڑواں بیٹیوں سے نوازے تاکہ انہیں کپڑے ایک جیسے پہناؤں، لیکن اللّٰہ نے مجھے امیدوں سے نوازا اور پھر مجھے میرے خواب ملے۔
ایناس ہنیہ نے کہا کہ جب مونا بڑی ہوئی اور امل کے قد کے قریب پہنچی تو میں بہت خوش ہوئی اور پھر دونوں نے ایک جیسے کپڑے پہننا شروع کیے۔
اسماعیل ہنیہ کی بہو نے شہید بچیوں کی تصاویر شیئر کرتے ہوئے کہا کہ میں ان کے لیے بہت خوش تھی۔ کیونکہ مونا امل کو کبھی اکیلا چلنے نہیں دیتی تھی، وہ اس کی تمام حرکتوں کی نقل کرتی تھی اور وہ ایک دوسرے سے اتنی گہری محبت کرتی ہیں کہ جیسے ہم سب ایک ہی کفن میں ہوں۔
ایناس ہنیہ نے یہ بھی کہا کہ یہ سب محبت اور لگاؤ ہے، میرے دل، میری امیدیں۔ اللّٰہ تمہارے لیے آسانیاں کرے، میری پیاری بیٹیو، اور جنت میں ہم سب کی ملاقات ہو۔
