بریڈفورڈ (محمد رجاسب مغل ) بریڈفورڈ سے تعلق رکھنے والے یونس چوہدری کو نیو ائر آنرز لسٹ میں ایم بی ای سے نوازا گیا ۔یہ اعزاز ان کی کاروباری خدمات اور بریڈفورڈ کی کمیونٹی کیلئےخدمات کے اعتراف میں دیا گیا۔ یونس چوہدری نے گزشتہ بیس برس میں برطانوی کاروبار اور بین الاقوامی تجارت میں شاندار کامیابیاں حاصل کیں اور ساتھ ہی ہر موقع پر بریڈفورڈ کی کمیونٹی اور دیگر علاقوں میں مدد فراہم کی۔ نہایت سادہ حالات میں زندگی کا آغاز کرنے والے یونس چوہدری نے نہ صرف یو کے، کے سب سے کامیاب فوڈ گروپس میں سے ایک، ریگل فوڈ پراڈکٹس گروپ پی ایل سی (جس میں ریگل بیکری، ریگل فوڈز، یارکشائر بیکنگ کمپنی، جسٹ ڈیزرٹس یارکشائر، اور لو ہیڈ میڈ کیکس شامل ہیں) کو تعمیر کیا بلکہ وہ برطانیہ کے سب سے دلچسپ اور قابل احترام کاروباری شخصیات میں سے ایک بن گئے۔ یونس چوہدری برطانوی معیشت میں مثبت حصہ ڈالنے کا سلسلہ جاری رکھے ہوئے ہیں اور برآمدات کی اہمیت کے بہترین سفیر ہیں۔ وہ ہر موقع پر ’’واپس لوٹانے‘‘ کے جذبے کو زندہ رکھتے ہیں۔ چاہے وہ کمیونٹی کے کھیلوں کے کلبز کی حمایت ہو، مقامی لوگوں کو خوراک فراہم کرنا ہو، یا بیرون ملک خیراتی تنظیموں کیساتھ کام کرنا ہو، یونس چوہدری ہرممکن طریقے سے دوسروں کی زندگی میں بہتری لا رہے ہیں۔ یونس چوہدری کو حال ہی میں دی ٹائمز کے اشتراک سے دی ایل ڈی سی ٹاپ 50موسٹ ایمبیشیس بزنس لیڈرز 2024میں بھی شامل کیا گیا۔ یونس چوہدری ایم بی ای نے اپنے خیالات کا اظہار کرتے ہوئے کہا کہ جب میں نے بیس سال پہلے کاروبار کا آغاز کیا تو میں اس سفر کیلئے بالکل تیار نہیں تھا جو میں نے طے کیا، نہ صرف کاروبار میں بلکہ زندگی میں بھی جس کمیونٹی میں میں رہتا ہوں اور جس کے اندر میں نے اپنا کاروبار بنایا، وہ میرے لیے سب کچھ ہے اور میں اس کا حصہ بن کر خود کو خوش قسمت محسوس کرتا ہوں، واپس لوٹانا میرا فرض ہے، لیکن مجھے اتنی عزت ملنے پر بے حد خوشی محسوس ہو رہی ہے۔ میں آج جو کچھ ہوں، اپنے والدین کی دعاؤں اور رہنمائی کے بغیر نہیں بن سکتا تھا۔ میں ان کا دل سے شکریہ ادا کرتا ہوں۔ اس کیساتھ میں اپنی بیوی، بچوں، اور بھائیوں کا بھی شکرگزار ہوں جو ہمیشہ میرے ساتھ رہے۔ یونس چوہدری کے حوالے سے شاہد آفریدی چیئرمین شاہد آفریدی فاؤنڈیشن نے خیالات کا اظہار کرتے ہوئے کہا کہ یونس ایک مہربان، دریا دل اور کامیابی کے باوجود نہایت عاجز انسان ہیں۔ شاہد آفریدی فاؤنڈیشن کیلئے ان کی سخاوت بہت اہم ہے، جس سے پسماندہ کمیونٹیز کو وہ سہولتیں ملتی ہیں جو مغربی دنیا میں عام سمجھی جاتی ہیں۔ دی رائٹ آنرایبل بیرونس سعیدہ وارثی کا کہنا تھا کہ یونس چوہدری نے یہ ثابت کیا کہ ایک مضبوط اور کامیاب کاروبار محنت اور عزم سے تعمیر کیا جا سکتا ہے۔ وہ دیگر کاروباری شخصیات کیلئے ایک رول ماڈل بن چکے ہیں۔ یونس ایک مشہور انسان دوست ہیں اور بریڈفورڈ اور یارکشائر میں خوب پہچانے جاتے ہیں۔ جب بات کمیونٹی کی خدمت کی ہو، وہ ہر جگہ موجود ہوتے ہیں۔
فرمان الہی
نماز کے اوقات
