فرمان الہی
نماز کے اوقات
آئی سی سی چیمپئنز ٹرافی 2025 کے لیے 15 رکنی پاکستان کرکٹ ٹیم کا اعلان کردیا گیا، یہی ٹیم نیوزی لینڈ اور جنوبی افریقہ کے خلاف سہ فریقی ون ڈے سیریز میں بھی حصہ لے گی۔
ٹیم میں فخر زمان خوشدل شاہ سعود شکیل اور فہیم اشرف کی واپسی ہوئی ہے، فخر زمان کے اوپننگ پارٹنر بابر اعظم یا سعود شکیل ہوسکتے ہیں۔
عبداللّٰہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخر زمان، خوشدل شاہ اور سعود شکیل کو ٹیم میں شامل کیا گیا ہے۔
بیٹرز: بابر اعظم، فخر زمان، کامران غلام، سعود شکیل، طیب طاہر شامل ہیں۔
قومی ٹیم میں آل راؤنڈرز: فہیم اشرف ، خوشدل شاہ ، سلمان علی آغا (نائب کپتان ) ہیں، وکٹ کیپر بیٹرز محمد رضوان (کپتان)، عثمان خان اور اسپنر ابرار احمد کو بھی ٹیم میں شامل کیا گیا ہے۔
پاکستان کرکٹ ٹیم کے اسکواڈ میں فاسٹ بولرزحارث رؤف، محمد حسنین، نسیم شاہ، شاہین شاہ آفریدی بھی شامل ہیں۔
15 کھلاڑیوں پر مشتمل اسکواڈ میں 4 تبدیلیاں کی گئی ہیں جنہوں نے آخری بار گزشتہ سال جنوبی افریقہ میں ون ڈے سیریز کھیلی تھی۔
یہی ٹیم چیمپئنز ٹرافی سے قبل کراچی اور لاہور میں ہونے والی سہ فریقی ون ڈے سیریز میں بھی حصہ لے گی جس میں نیوزی لینڈ اور جنوبی افریقہ شامل ہیں۔
چیمپئنز ٹرافی پاکستان میں 19 فروری سے 9 مارچ تک منعقد ہوگی۔
پی سی بی کے پاس اسکواڈ میں تبدیلی کے لیے 11 فروری تک کا وقت ہے اس کے بعد تبدیلی کی اجازت صرف طبی بنیادوں پر آئی سی سی ایونٹ ٹیکنیکل کمیٹی کی منظوری سے ہوگی۔
قومی ٹیم کے سلیکٹر اسد شفیق کا کہنا ہے کہ ہوم کنڈیشنز میں عمدہ کارکردگی کے حامل کرکٹرز کا سلیکشن کیا گیا ہے، ہمیں اندازہ ہے کہ صائم ایوب کے لیے چیمپئنز ٹرافی نہ کھیلنا کتنا تکلیف دہ ہے لیکن ہم جلد بازی میں کوئی بھی فیصلہ نہیں کرنا چاہتے۔
سہ ملکی ون ڈے سیریز اور آئی سی سی چیمپئنز ٹرافی 2025 کیلئے پلیئر سپورٹ اسٹاف میں نوید اکرم چیمہ (ٹیم منیجر)، حنا منور ( ٹیم آپریشنز منیجر)، عاقب جاوید (عبوری ہیڈ کوچ )، اظہر محمود (اسسٹنٹ کوچ)، شاہد اسلم (بیٹنگ) کوچ)، محمد مسرور (فیلڈنگ کوچ)، عبدالرحمن (اسپن بولنگ کوچ) شامل ہیں۔
پاکستان چیمپئنز ٹرافی میں اپنا پہلا میچ 19 فروری کو نیوزی لینڈ کے خلاف کراچی میں کھیلے گا۔
قومی ٹیم 4 فروری سے تیاریوں کا آغاز کرے گی۔ تین ملکی سیریز کا پہلا میچ پاکستان اور نیوزی لینڈ کے درمیان 8 فروری کو لاہور میں کھیلا جائے گا۔
دوسری جانب چیئرمین پی سی بی محسن نقوی نے کہا کہ اسٹیڈیمز کی تعمیر کا کام وقت پر مکمل ہوگا، وزیراعظم شہباز شریف 7 فروری کو قذافی اسٹیڈیم لاہور اور صدر زرداری 11 فروری کو نیشنل اسٹیڈیم کراچی کا افتتاح کریں گے۔
لاہور میں نیوز کانفرنس سے خطاب کرتے ہوئے محسن نقوی نے کہا کہ کام بروقت مکمل ہونے سے بہت لوگوں کے خواب ٹوٹے ہیں جو ایونٹ کو باہر لے جانا چاہتے تھے۔
ان کا کہنا تھا کہ صائم ایوب کی طبعیت پہلے سے بہت بہتر ہے، پلستر اتر گیا ہے، 2026 میں ریڈبال اور وائٹ بال کی ٹیمیں مختلف نظر آئیں گی۔
