فرمان الہی
نماز کے اوقات
بالی ووڈ کی متنازع اداکارہ و رقاصہ راکھی ساونت کا کہنا ہے کہ ماہرہ خان سے زیادہ خوبصورت ہانیہ عامر ہیں۔
راکھی ساونت نے حال ہی میں ایک پاکستانی ویب شو سے ٹیلی فونک گفتگو کی جس میں اُن سے یہ سوال پوچھا گیا کہ آپ کو پاکستانی اداکارہ ہانیہ عامر سے اتنی محبت کیسے ہوگئی؟
اُنہوں نے اس سوال کے جواب میں کہا کہ مجھے ہانیہ عامر بہت پسند ہیں، ان کے ڈرامے بہت پسند ہیں، وہ اتنی اچھی، چلبلی اور زبردست اداکارہ ہیں کہ میں نے سلمان بھائی کو فون کر کے ہانیہ عامر کے ساتھ ایک فلم کرنے کا کہا ہے۔
بھارتی اداکارہ نے کہا کہ میں نے سلمان بھائی کو کہا ہے کہ بھارتی اداکاراؤں کو چھوڑیں اور پاکستانی اداکارہ ہانیہ عامر کے ساتھ کام کریں کیونکہ آپ کی اور ہانیہ عامر کی آن اسکرین جوڑی لوگوں کو بہت پسند آئے گی۔
اُنہوں نے مزید کہا کہ ماہرہ خان جنہوں نے شاہ رخ خان کے ساتھ ایک بالی ووڈ فلم میں کام کیا تھا لوگ ہانیہ عامر کو ان سے بھی زیادہ پسند کریں گے۔
راکھی ساونت نے کہا کہ مجھے ماہرہ خان بھی اچھی لگتی ہیں لیکن وہ اتنی خوبصورت نہیں ہیں جتنی خوبصورت ہانیہ عامر ہیں۔
اُنہوں نے یہ بھی کہا کہ سلمان خان نے اگر ہانیہ عامر کو اپنی فلم میں بطور ہیروئن کاسٹ کرلیا تو ان کی وہ فلم سُپر ہٹ ہوگی اور باکس آفس پر 10 ہزار کروڑ سے بھی زیادہ پیسے کمائے گی۔
