فرمان الہی
نماز کے اوقات
چین میں ایک شہری کی دل کا دورہ پڑنے کے باوجود ملازمت پر جانے کی ضد دیکھ کر لوگ حیران رہ گئے۔
چینی میڈیا کے مطابق صوبہ ہنان میں 4 فروری کو ایک شہری ملازمت پر جانے کے لیے ٹرین میں سوار ہونے کے لیے ریلوے اسٹیشن میں لگی لائن میں کھڑا تھا جہاں اسے اچانک دل کا دورہ پڑا اور وہ گر پڑا۔
میڈیا رپورٹس کے مطابق اس 40 سالہ شخص کی مدد کے لیے کئی لوگ اور ایک ڈاکٹر فوراً پہنچے، 20 منٹ بعد اس شخص کو ہوش آیا اور اس نے سب سے پہلے کہا کہ مجھے جلدی کام پر پہنچنا ہے، میں اسپتال جانا ضروری نہیں سمجھتا۔
چینی شہری کی یہ بات سن کر سب حیران رہ گئے۔
موقع پر موجود ایک ڈاکٹر نے شہری پر زور دیا کہ وہ پہلے اسپتال جائے کیونکہ اسے گرنے کی وجہ سے بھی چوٹیں آئی ہیں۔
شروع میں وہ شخص انکار کرتا رہا تاہم سمجھانے کے بعد وہ ایمبولینس میں جانے کے لیے راضی ہو گیا۔
اس سارے واقعے نے چین میں سیکڑوں لوگوں کو حیران کر دیا ہے جبکہ کئی افراد اس شخص پر افسوس بھی کر رہے ہیں۔
انٹرنیٹ پر ایک صارف نے کہا ہے کہ اس شخص نے اٹھنے کے بعد سب سے پہلے پیسے کمانے کا سوچا۔
ایک شخص نے لکھا کہ وہ آدمی اس معاشرے میں اکیلا نہیں ہے، ہم میں سے اکثر لوگوں کو گھر کے کرائے سے لے کر بچوں کی تعلیم تک بہت زیادہ بوجھ اٹھانا پڑتا ہے۔
اس حوالے سے مزید ایک صارف نے لکھا کہ یہ سب کے لیے آسان نہیں ہے۔
غیر ملکی میڈیا کے مطابق چین میں بے روزگاری بڑھنے اور ملازمتوں کے دوران کام کے زیادہ اوقات کی اکثر خبریں سامنے آتی ہیں۔
