فرمان الہی
نماز کے اوقات
سپریم کورٹ آف پاکستان کے نئے ججز نے عہدے کا حلف اٹھا لیا۔
چیف جسٹس آف پاکستان یحییٰ آفریدی نے آج سپریم کورٹ میں حلف برداری کی تقریب میں سپریم کورٹ میں نئے تعینات ہونے والے 6 ججوں سے حلف لیا۔
جسٹس عامر فاروق، جسٹس ہاشم کاکڑ، جسٹس اشتیاق ابراہیم، جسٹس شکیل احمد، جسٹس شفیع صدیقی اور جسٹس صلاح الدین پنہور نے سپریم کورٹ کے جج کا حلف اٹھایا۔
تقریبِ حلف برداری میں اسلام آباد ہائی کورٹ کے جج محسن اختر کیانی، اٹارنی جنرل، وکلاء، لاء افسران اور عدالتی اسٹاف نے شرکت کی۔
واضح رہے کہ صدرِ مملکت آصف علی زرداری نے نئے ججوں کی تقرری کی منظوری دی تھی۔
دوسری جانب قائم مقام چیف جسٹس سندھ ہائی کورٹ جسٹس جنید غفار نے بھی عہدے کا حلف اٹھا لیا۔
گورنر ہاؤس کراچی میں گورنر سندھ کامران خان ٹیسوری نے قائم مقام چیف جسٹس سندھ ہائی کورٹ سے حلف لیا۔
حلف برداری کی تقریب میں ایڈیشنل اٹارنی جنرل، سندھ ہائی کورٹ کے ججز، ایڈووکیٹ جنرل سندھ اور دیگر نے شرکت کی۔
علاوہ ازیں صدرِ مملکت آصف زرداری نے قائم مقام چیف جسٹس اسلام آباد ہائیکورٹ جسٹس سرفراز ڈوگر سے حلف لیا۔
پشاور کے گورنر ہاؤس میں قائم مقام چیف جسٹس پشاور ہائی کورٹ جسٹس سید محمد عتیق شاہ کی تقریبِ حلف برداری ہوئی۔
اس موقع پر گورنر کے پی فیصل کریم کنڈی نے حلف لیا۔ وزیراعلیٰ خیبرپختونخوا علی امین گنڈاپور بھی تقریبِ حلف برداری میں شریک ہوئے۔
