فرمان الہی
نماز کے اوقات
بھارتی کرکٹ ٹیم کے سابق کپتان سارو گنگولی نے اپنی زندگی پر مبنی فلم میں مرکزی کردار ادا کرنے والے اداکار کا نام خود ہی بتا دیا۔
بھارتی میڈیا کے مطابق اس سے قبل کئی اداکاروں کے ناموں سے متعلق افواہیں گردش کر رہی تھیں لیکن اب سارو گنگولی نے خود ہی بتادیا ہے کہ فلم میں ان کا کردار کون نبھائے گا۔
سارو گنگولی نے بھارتی میڈیا سے گفتگو کرتے ہوئے کہا ہے کہ میں نے جو سنا ہے وہ یہ ہے کہ راج کمار راؤ میرے کردار کو ادا کریں گے، لیکن تاریخوں کے مسائل ہیں اس لیے فلم ریلیز ہونے میں ایک سال سے زیادہ کا وقت لگے گا۔
یاد رہے کہ اس سے قبل سابق بھارتی کپتان ایم ایس دھونی، محمد اظہر الدین اور کپل دیو کی زندگی پر بھی فلمیں بنائی جا چکی ہیں۔
ایم ایس دھونی کا کردار آنجہانی اداکار سشانت سنگھ راجپوت جبکہ کپل دیو کا کردار اداکار رنویر سنگھ نے ادا کیا تھا۔
واضح رہے کہ سابق کرکٹر سارو گنگولی نے 113 ٹیسٹ اور 311 ون ڈے انٹرنیشنل میچز کھیلے ہیں۔
بائیں ہاتھ کے بیٹر نے اپنے انٹرنیشنل کیریئر میں تمام فارمیٹس میں 18،575 رنز بنائے ہیں۔
