فرمان الہی
نماز کے اوقات
ایلون مسک کے سوشل میڈیا نیٹ ورک ایکس نے بھارتی حکومت کے خلاف عدالت میں مقدمہ دائر کر دیا۔
عدالت میں 5 مارچ کو دائر کی گئی درخواست میں یہ مؤقف اختیار کیا گیا ہے کہ بھارتی وزارتِ آئی ٹی نے سوشل میڈیا سے مواد کو ہٹانے کی اجازت دینے کے لیے اپنے سنسر شپ کے اختیارات کو غیر قانونی طور پر بڑھا دیا ہے۔
درخواست میں کہا گیا ہے کہ بھارتی وزارتِ آئی ٹی نے مختلف سرکاری محکموں کو اختیار دے دیا ہے کہ وہ وزارتِ داخلہ کے ذریعے مواد بلاک کرنے کے احکامات جاری کر سکیں۔
درخواست میں عدالت کو آگاہ کیا گیا ہے کہ نئے نظام میں وہ قانونی تحفظات نہیں ہیں جن کے تحت صرف قومی سلامتی یا ملک کی خود مختاری کو نقصان پہنچانے والے مواد کو ہٹایا جا سکتا تھا اور اس پر اعلیٰ حکام کی سخت نگرانی ہوتی تھی۔
درخواست میں عدالت کو یہ بھی بتایا گیا ہے کہ سوشل میڈیا سے مواد ہٹانے کے لیے بھارت کی جانب سے بنائی گئی ویب سائٹ میں ایسا متوازی میکانزم موجود ہے جس کے ذریعے بھارت میں سوشل میڈیا سے مواد کو بغیر اجازت کے ہٹایا جا رہا ہے۔
بھارتی وزارتِ آئی ٹی کی جانب سے اس معاملے پر فی الحال کوئی ردِعمل نہیں دیا گیا۔
بھارتی ریاست کرناٹک کی ہائی کورٹ میں اس ہفتے کے آغاز پر کیس کی مختصر سماعت ہوئی لیکن کوئی حتمی فیصلہ نہیں ہو سکا جس کے بعد مزید سماعت 27 مارچ کے لیے ملتوی کر دی گئی۔
