فرمان الہی
نماز کے اوقات
پاکستانی شوبز انڈسٹری سے وابستہ معروف ہدایات کارہ و سینئر اداکارہ مرینہ خان نے اپنے کیریئر کے عروج پر خطرناک بیماری میں مبتلا ہونے کا انکشاف کر کے سب کو حیران کردیا۔
حال ہی میں اداکارہ نے پی ٹی وی کی سالگرہ کے خصوصی شو میں شرکت کی، جہاں انہوں نے اپنی صحت سے متعلق ماضی کی یادوں کو تازہ کیا اور بتایا کہ کیریئر کے عروج پر انہیں ایک نہایت خوفناک طبی مسئلے کا سامنا کرنا پڑا تھا۔
دورانِ انٹرویو انہوں نے ڈرامہ سیریل ’تنہائیاں‘ اور ’دھوپ کنارے‘ کا زمانہ یاد کیا اور ایک سوال کا جواب دیتے ہوئے کہا کہ مجھے ’فیشل پیرالائز‘ (یعنی چہرے کا فالج) تشخیص ہوا تھا، جس کے باعث چہرے کا ایک حصہ ڈھلک گیا تھا، تاہم میں نے کبھی لوگوں کی پروا نہیں کی اور معمول کی زندگی جاری رکھی۔
انہوں نے گفتگو جاری رکھتے ہوئے ہنستے ہوئے ایک دلچسپ واقعہ بھی سنایا کہ خاندان کی ایک شادی میں مجھے میرے بھائی کے سسر نے مشورہ دیا کہ میں اسٹیج کے قریب کھڑی نہ ہوں، ورنہ دلہا سمجھے گا کہ میں اسے آنکھ مار رہی ہوں، کیونکہ میرے چہرے کا ایک حصہ ڈھلکا ہوا تھا اور اس جانب کی آنکھ پوری طرح بند نہیں ہوتی تھی۔
واضح رہے کہ بعدازاں مرینہ خان مکمل طور پر صحت یاب ہو گئیں، اداکارہ ہونے کے باوجود انہوں نے اس حالت کو کبھی اپنی عدم اعتماد کی وجہ نہیں بننے دیا۔
مارینہ خان کا شمار پاکستان کی بڑی شوبز شخصیات میں ہوتا ہے۔ تنہائیاں اور دھوپ کنارے جیسے ڈراموں سے انہوں نے شہرت کی بلندیوں کو چھوا اور ان کے کردار آج بھی شائقین کے دلوں میں زندہ ہیں۔
