فرمان الہی
نماز کے اوقات
ایشیا کپ انڈر 19 میں پاکستان کی شاندار فتح کے بعد ٹیسٹ ٹیم کے کپتان شان مسعود نے سرفراز احمد کو خراج تحسین پیش کیا۔
خیال رہے کہ پاکستان نے بھارت کو 191 رنز سے شکست دیکر ٹائٹل اپنے نام کرلیا، پاکستان انڈر 19 ایشیا کپ کا ٹائٹل دوسری مرتبہ جیتنے میں کامیاب ہوا ہے، اس سے قبل پاکستان اور بھارت 2012 کے ایونٹ میں مشترکہ طور پر فاتح رہے تھے۔
اس حوالے سے سماجی رابطے کی ویب سائٹ ایکس پر پاکستان ٹیسٹ ٹیم کے کپتان شان مسعود نے کھلاڑیوں کی تعریف کرتے ہوئے ٹیم منیجر اور مینٹور سرفراز احمد سمیت کوچنگ اسٹاف کو بھی خراج تحسین پیش کیا ہے۔
اپنے پیغام میں شان مسعود نے کہا کہ آج پاکستان کے لیے ایک خاص اور یادگار دن رہا، انڈر 19 ٹیم نے بڑے میچ میں شاندار فتح حاصل کر کے سب کے دل جیت لیے۔
شان مسعود نے کہا کہ کھلاڑیوں نے بے خوف کھیل، غیرمعمولی پختگی، خود اعتمادی اور ٹیم ورک کا مظاہرہ کرتے ہوئے ثابت کیا کہ وہ دباؤ کے لمحات میں بھی بہترین کارکردگی دکھانے کی صلاحیت رکھتے ہیں۔
انہوں نے اپنے پیغام میں انڈر 19 ٹیم کے منیجر اور مینٹور سرفراز احمد اور ان کے کوچنگ اسٹاف کو بھی خصوصی خراجِ تحسین پیش کیا، جن کی رہنمائی میں ٹیم نے یہ اہم کامیابی حاصل کی۔
