فرمان الہی
نماز کے اوقات
اے نگارِ وطن!
تیرے لعل و گہر
اجنبی راستوں پر کھڑے ہیں مگر
ڈھونڈتے ہیں ہر اِک موڑ پر
وہ یہی بام و دَر
تنگ گلیاں تِری
کچے، پکے مکاں
جو مسافر کو دیتے تھے
ہر دَم اماں
ملگجی روشنی میں اُبھرتی اذاں
جھاڑیاں کاٹتا مُنحنی باغ باں
تیرے سارے پہر
تیرے شام و سحر
ڈھونڈتے ہیں یہی بام و دَر
تیرے لعل و گہر
اے نگارِ وطن!
تیرے لعل و گہر
بِچھ گیا ان کے پیروں تلے
فرقتوں کا سفر
دھوپ اوڑھے ہوئے دربدر
پِھر رہے ہیں اگر
وقت کا جبر ہے
اے نگارِ وطن!
تیرے لعل وگہر
ان کا دامن دُعاؤں سے بھر
یہ جہاں بھی رہیں
نہ جُھکے ان کا سر
وقت کے جبر کی
اِن کو لمبی سزا
اے خدا، نہ ملے
