فرمان الہی
نماز کے اوقات
اسلام آباد (طاہر خلیل)چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے امریکی افغانستان وار کمیشن کے ایک اعلیٰ سطحی وفد نے جنرل ہیڈ کوارٹرز (جی ایچ کیو) راولپنڈی میں ملاقات کی۔ وفد کی قیادت کمیشن کے شریک سربراہان شمیلہ این چوہدری اور ڈاکٹر کولن ایف جیکسن کر رہے تھے۔ آئی ایس پی آر کے مطابق امریکی وفد افغانستان میں امریکہ کی 20 سالہ عملی شمولیت اور سرگرمیوں کا جائزہ لے رہا ہے۔ ملاقات کے دوران باہمی دلچسپی کے اہم امور، خطے کی مجموعی سکیورٹی صورتحال، افغانستان میں حالیہ پیش رفت اور پاکستان کی جانب سے فراہم کئے گئے تعاون پر تفصیلی گفتگو کی گئی جس میں کمیشن کے مینڈیٹ سے متعلق پہلوؤں پر خصوصی توجہ دی گئی۔اس موقع پر گفتگو کرتے ہوئے فیلڈ مارشل سید عاصم منیر نے تنازع کو جنم دینے والے سکیورٹی عوامل پر پاکستان کے موقف کو اجاگر کیا اور طویل افغان تنازع کے دوران پاکستان کو درپیش سنگین چیلنجز کا احاطہ کیا۔ انہوں نے اس امر پر زور دیا کہ تنازع کے اسٹرٹیجک، سفارتی اور عسکری پہلوؤں کے حقیقت پسندانہ جائزے کیلئے علاقائی نقطہ نظر اور پاکستان کے زمینی تجربات کو شامل کرنا ناگزیر ہے۔
