فرمان الہی
نماز کے اوقات
امیر ہونا شاید اتنا بڑا مسئلہ نہ ہو لیکن اس امارت کو قائم ودائم رکھنا آسان نہیں ہوتا۔ دنیا میں جتنے بھی امیر وکبیرافراد ہیں ، ان کو لوگ رشک کی نگاہ سے دیکھتے ہیں لیکن اس مقام تک پہنچنے میں ان کی ذہانت ، محنت اور دن رات کی لگن نے ان کاساتھ دیا۔ جب بھی امیر ترین افراد کا ذکر ہو تو آپ کےذہن میں شاید دو تین نام ہی آتے ہوں گے تاہم، ہم آپ کودنیا کےکچھ مزید امیر ترین افراد سے ملواتے ہیں ، جنہوں نے اینٹر پرینیوئر شپ کی دنیا میں کامیابی کےجھنڈے گاڑ دیے ۔
10۔ چارلس کوچ
48.4 بلین ڈالر
یکم نومبر 1935ءکو پیدا ہونے والے چارلس کوچ ، ڈیوڈ کوچ(نویں نمبر پر) کے بڑے بھائی ہیں۔امریکی معیشت میں کاغذاور لکڑی سے وابستہ کوچ انڈسٹری کے چیئر مین اور سی ای او ہیں ۔ اپنے بھائی کی طرح فلاحی کاموں میں دل کھول کر خرچ کرتے ہیں۔ دونوں بھائیوں میں کئی قدریں مشترک ہیں۔
9۔ڈیوڈ کوچ
48.5 بلین ڈالر
3 مئی 1940 ء کو پیدا ہونےوالے ڈیوڈ کوچ بہت سی صلاحیتوں کے مالک اور قسمت کے دھنی ہیں۔ وہ 1991 ء میں فضائی حادثے میں بال بال بچےگئے تھے ، شاید اس کی وجہ انسانیت کیلئے کیے جانے والے ان کے فلاحی کام ہیں۔ یہ کوچ انڈسٹریز کے وائس پریزیڈنٹ ہیں ۔ سیاسی سوجھ بوجھ کے ساتھ یہ ریپبلکن پارٹی کی طرف جھکائو رکھتے ہیں ۔
8۔برنارڈارنالٹ
54.6 بلین ڈالر
فرانس کی معیشت میں اہم کردار اداکرنے والے برنارڈ5 مارچ 1948 ء کو پیدا ہوئے ۔ دنیا میں سب سے بڑی گڈس کمپنی LVMHکے سی ای او اور چیئر مین کے علاوہ لگثری گڈزفروخت کرنے والی کمپنی کرسٹن ڈائر ایس اے کے چیئر مین بھی ہیں۔ سپر مارکیٹس سمیت کئی کاروبار میںانھوں نے سرمایہ کاری کی ہوئی ہے۔ فنِ مصوری سے بھی شغف رکھتے ہیں اورکئی فن پارے جمع کررکھے ہیں۔
7۔لیری الیسن
60.4 بلین ڈالر
17اگست 1944 ءکو پیدا ہونے والے لارنس جوزف الیسن، اوریکل کارپوریشن کے شریک بانی ہیں اور کمپنی کے سی ای او بھی رہ چکے ہیں۔ 175 ممالک میں اس کمپنی کے4 لاکھ 30 ہزار کسٹمرز ہیں ، یہ کمپنی دنیا بھر میںسوفٹ ویئر، پلیٹ فارم ، انفرااسٹرکچر اور ڈیٹا کی مد میںجدید ترین سروس فراہم کرتی ہے۔
6۔ کارلوس سلِم
68.7 بلین ڈالر
امریکی معیشت کروڑ پتی افرا د کے معاملے میں زرخیز ہے۔ میکسیکو سے تعلق رکھنے والے کارلوس سلم بھی اس فہرست میں ہیں جو 28 جنوری 1940ء کو پیدا ہوئے۔ کارلوس بہت ساری انڈسٹریل ، میڈیا ، ریٹیل اور ٹیلی کمیونیکیشنز کمپنیوں میں حصہ دار ہیں اور ان کمپنیوں میں آئٹمز اور پروڈکٹس فراہم کرتے ہیں۔ یہی نہیں بلکہ کارلوس سلم، امیریکا موول اور سام سنگ میکسیکو جیسی کمپنیوں کے سی ای او بھی رہے ہیں۔ وہ2010ء سے 2013ء تک غیر متنازعہ امیر ترین آدمی رہ چکے ہیں۔ فلاحی کاموں میں بھی فیاض ہیں ۔
5۔ مارک زوکر برگ
72.4 بلین ڈالر
مارک زوکر برگ کو کون نہیں جانتا ۔ فیس بک کا یہ مسکراتا چہرہ 14 مئی 1984 ءکو دنیا میں آیا اور کم عمری میں ہی امیر ترین افراد کی فہرست میں شامل ہوگیا۔ فیس بک لانچ کرتے وقت ان کی عمر صرف 20 سال تھی۔
4۔امانیکو اورٹیگا
78 بلین ڈالر
28 مارچ 1936ء کو پید ا ہونےو الے امانیکو امریکی نہیں بلکہ ہسپانوی بزنس ٹائیکون ہیں ۔ انیڈیٹیکس فیشن گروپ کے شریک بانی ہیں ۔ یہ کمپنی اپنے آٹھ برانڈ( Zara, Pull&Bear, Massimo Dutti, Bershka, Stradivarius, Oysho, Zara Home اورUterqüe) کے ساتھ دنیا بھر میں 7448 اسٹورز اور 96فیصد مارکیٹ شیئر رکھتی ہے۔ امانیکو 2011 ء میں ریٹائر ہوگئے تھے ۔ وہ ایک مذہبی سماجی ادارے کو 20 ملین یورو کا عطیہ بھی کرچکے ہیں۔
3۔وارن بفیٹ
84.5 بلین ڈالر
اس فہرست میں یہ سب سے عمر رسیدہ شخص ہیں ۔30 اگست 1930 ء کو پیدا ہونےوالے وارن بفیٹ دنیا کی بے مثال کامیاب کاروباری شخصیت ہیں ۔ سرمایہ کاری کی دنیا میں بروقت فیصلے کی بدولت ایک ٹیکسٹائل کمپنی حاصل کی اور اسے ایک ہولڈنگ کمپنی میں تبدیل کردیا۔ سرمایہ کاری کی دنیا میں انہیں ’’ جادوگر‘‘ کہا جاتاہے۔
2۔ بل گیٹس
91.5 بلین ڈالر
بل گیٹس کے نام سے مشہور ولیم ہنری گیٹس 28 اکتوبر 1955 ء کو پیدا ہوئے ۔ مائکروسوفٹ کے بانی ہیں ۔ 1995ء سے لے کر اب تک ٹاپ 10 کی فہرست سے باہر نہیں ہوئے۔ کمپنی سے ریٹائر ہونے کے بعد اس کی باگ ڈور سی ای او ستیا ناڈیلا کے حوالے کردی ۔ اب اپنی شریک حیات میلنڈا کے ساتھ ’ بل اینڈ میلنڈا گیٹس فائونڈیشن کانظم و نسق سنبھالتے ہیں۔
1۔جیف بیزو ز
135 بلین ڈالر
دنیا میں شاید ہی کوئی ایسا ہو جو انٹرنیٹ پر شاپنگ کرتا ہو اور ایمیزون ڈاٹ کام کو نہ جانتا ہو۔ جیف کا پورا نام جیفری پریسٹون جورگینسن ہے جنہوں نے 12 جنوری 1964 ء کو دنیا میں آنکھ کھولی ۔ یہ امیزون ڈاٹ کام کے بانی ،چیئر مین اور سی ای او ہیں۔
