آپ آف لائن ہیں
جنگ ای پیپر
بدھ5؍ ربیع الاوّل 1440ھ 14؍نومبر2018ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

مولانا اسمٰعیل میرٹھی

تنے گا مسرّت کا اب شامیانہ

بجے گا محبت کا نقّار خانہ

حِمایت کا گائیں گے مل کر ترانہ

کرو صبر آتا ہے اچھا زمانہ

نہ ہم روشنی دن کی دیکھیں گے لیکن

چمک اپنی دکھلائیں گے اب بھلے دن

رُکے گا نہ عالم ترقی کئے بن

کرو صبر آتا ہے اچھا زمانہ

ہر اک توپ سچ کی مدد گار ہوگی

خیالات کی تیز تلوار ہوگی

اسی پر فقط جیت اور ہار ہوگی

کرو صبر آتا ہے اچھا زمانہ

زبانِ قلم سیف پر ہوگی غالب

دبیں گے نہ طاقت سے پھر حق کے طالب

کہ محکوم حق ہوگا دنیا کا قالب

کرو صبر آتا ہے اچھا زمانہ

زمانہ نسب کو نہ پوچھے گا ہے کیا

مگر وصفِ ذاتی کا ڈنکا بجے گا

اُسی کو بڑا سب سے مانے گی دنیا

کرو صبر آتا ہے اچھا زمانہ

لڑائی کو انسان سمجھیں گے ڈائن

تفاخُر پہ ہوگی نہ قوموں میں ان بن

مشیخت کی خاطر اُڑے گی نہ گر دن

کرو صبر آتا ہے اچھا زمانہ

عقیدوں کی مٹ جائ گی سب رقابت

مذاہب کو ہوگی تعصب سے فُرصت

مگر اُن کی بڑھ جائیگی اور طاقت

کرو صبر آتا ہے اچھا زمانہ

کریں سب مدد ایک کی ایک مِل کر

یہی بات واجب ہے ہر مرد وزن پر

لگےہاتھ سب کا تو اُٹھ جائے چھپّر

کرو صبر آتا ہے اچھا زمانہ

Chatاپنی رائے سے آگاہ کریں