سحری کا وقت ہوا.. گھر حلوہ پوری، پراٹھے اور پائے کی خوشبو سے مہک اٹھا!

رمضان کا مہینہ ہر سال کی طرح اس سال بھی اپنے ساتھ سحرو افطار کی رونقیں لے کر آچکا ہے۔دسترخوان سجیں گے اور سحرو افطار کا خوب ذوق و شوق سے اہتمام ہو گا۔ہمارے ہاں لوگ کھانے پینے کے خاصےشوقین ہیں۔صرف افطار میں ہی نہیں سحری کے وقت بھی خوب مزیدار پکوان تیارکیے جاتے ہیں۔سحری کے وقت پراٹھے،انڈے ،چنے،حلوہ پوری،نہاری،پائے پھینی اور لسی کا خاص اہتمام کیا جاتا ہے۔ان کے علاوہ اور کئی مختلف پکوانوں سے بھی لطف اندوز ہوا جاتا ہے۔سحری میں شوق سے کھائے جانے والے ناشتوں کی تراکیب ملاحظہ فرمائیں۔

مرغ چنے

اجزاء۔

چکن لیگز۔ چار سو گرام

تیل۔ آدھا کپ

پیاز ۔ ایک عدد(چوپ کیا ہوا)

ثابت زیرہ۔ ایک چائے کا چمچ

سبز مرچ ۔چوپ کی ہوئی دو عدد

ادرک لہسن پیسٹ ۔ڈیڑھ کھانے کا چمچ

ٹماٹر ۔دو عدد

دہی ۔دو کھانے کے چمچ

نمک ۔حسبِ ذائقہ

گرم پانی۔ ایک کپ

اُبلے ہوئے سفید چنے ۔ڈیڑھ کپ

مرغ چنا مصالحہ۔ دو کھانے کے چمچ

مرغ مصالحہ بنانے کا طریقہ

اجزاء۔

نمک۔ ایک کھانے کاچمچ

ثابت دھنیا ۔دو کھانے کے چمچ

ثابت زیرہ ۔دو کھانے کے چمچ

لونگ ۔آٹھ عدد

لال مرچ پسی ہوئی۔ دو کھانے کے چمچ

دار چینی ۔تین عدد

بڑی اِلائچی۔ تین عدد

بادیان ۔دو عدد

سبز اِلائچی۔ چار عدد

چکن پاؤڈر ۔تین کھانے کے چمچ

میٹھا سوڈا۔ آدھا چائے کاچمچ

اجوائن ۔ایک چوتھائی چائے کا چمچ

جاوتری۔ پانچ گرام

ہلدی۔ ایک چائے کا چمچ

ان سب کو بھون کر گرائینڈ کر لیں اور استعمال کر یں ۔

ترکیب۔

۔ ایک پین میں کھانے کا تیل لیں اور ا س میں پیاز ،ثابت زیرہ اورسبز مرچ ڈال کر لائٹ براؤن کر لیں ۔

۔اب اس میں ادرک لہسن پیسٹ، چکن لیگز ،ٹماٹر ،دہی ،نمک اور مرغ چنے مصالحہ ڈال کر دوسے تین منٹ تک بھون لیں ۔

اب اس میں گرم پانی (آدھا کپ )ڈال کر آٹھ سے دس منٹ تک دم دیں اور دو سے تین منٹ تک بھونائی کرلیں اوراس میں اُبلے ہوئے سفید چنے اور گرم پانی (آدھا کپ ) ڈال کر ایک سے دو منٹ تک پکا لیں ۔

۔اب اسے دو سے تین منٹ تک دم دینے کے بعدگارنش کر لیں ۔

مزیدار مرغ چنے تیار ہیں۔ان کو گرما گرم نان کے ساتھ سرو کریں۔

حلوہ پوری چنے

اجزاء۔

آئل۔ ایک چو تھائی

چنے(اُبلے ہوئے)۔ 200گرام

سوجی۔250گرام

چینی ۔500گرام

پیاز۔ ایک عدد

زیرہ(ثابت)۔ آدھا چائے کا چمچ

ہلدی۔ ایک چائے کا چمچ

لال مرچ پسی ہوئی۔ ایک کھانے کا چمچ

دھنیا پاؤڈر۔ ایک چائے کا چمچ

زیرہ پاؤڈر۔ ایک چائے کا چمچ

ادرک لہسن کا پیسٹ۔ ایک چائے کا چمچ

تیل۔ ایک کپ

پیلا رنگ ۔ایک چُٹکی

کھوپرا ۔20گرام

کشمش ۔20گرام

کاجو ۔20گرام

پستہ ۔20گرام

بادام ۔20گرام

میدہ۔ ایک کلو

نمک ۔حسبِ ذائقہ

ترکیب۔

چنے۔

ایک پین میں آئل ایک چوتھائی کپ ڈالیں، پیاز،ثابت زیرہ آدھا چائے کا چمچ ، ہلدی،ادرک لہسن کا پیسٹ، لال مرچ پسی ہوئی،دھنیا پاؤڈر،زیرہ پاؤڈر، اُبلے ہوئے چنے پانی ڈال کر ہلکی آنچ پر تین سے چار منٹ تک دم پر رکھ دیں۔چنےسرو کرنے کے لیے تیار ہیں۔

حلوہ۔

ایک پین میں تیل آدھا کپ،سوجی250گرام ڈال کر بھون لیں،پھر پانی میں پیلا فوڈ کلر ڈال کر،چینی، کھوپرہ ، کشمش،کاجو، پستہ ،بادام ڈال کر پانچ سے سات منٹ پکائیں۔حلوہ پکنےپر ایک پیالے میں نکال لیں۔

پوری۔

ایک کلو میدہ،نمک حسبِ ذائقہ ،تیل آدھا کپ اور پانی ڈال کر گوندھ لیں۔پندرہ سے بیس منٹ کے لیے رکھ دیں۔پھر پیڑے بنا لیں اور بیلن سے پھیلا کر پوری بنا لیں۔ اب ایک برتن میں آئل ڈال کر لائٹ براؤن ہونے تک ڈیپ فرائی کر لیں۔پوریاں تیار ہونے پر ایک پلیٹ میں رکھیں پھر حلوہ اور چنے کے ہمراہ پیش کریں۔

بیف نہاری

اجزاء۔

بیف۔ ایک کلو

آئل۔ آدھا کپ

پیاز۔ دو عدد

سفید زیرہ۔ ایک چائے کا چمچ

ادرک لہسن کا پیسٹ۔ دو چائے کا چمچ

ہری مرچ۔ پانچ عدد

نمک ۔حسبِ ذائقہ

سفید زیرہ پسا ہوا۔ ڈیڑھ چائے کا چمچ

دھنیا پسا ہوا ۔ڈیڑھ چائے کا چمچ

(دار چینی،بڑی اور چھوٹی الا ئچی،لونگ،تیز پتہ،جائفل) پسا ہوا۔ دو چائے کا چمچ

لال مرچ پسی ہوئی ۔آدھا چائے کا چمچ

ہلدی۔ ایک چائے کا چمچ

سونف پسی ہوئی۔ ڈیڑھ چائے کا چمچ

آٹا ۔آدھا کپ

ترکیب۔

پکانے والے بر تن میں آئل، پیاز، سفیدزیرہ ثابت ڈال کر لائٹ براؤن ہونے تک پکائیں۔ پھر ادرک لہسن کا پیسٹ ڈال کر لا ئٹ براؤن ہونے تک پکائیں۔پھر بیف، ہری مرچ ثابت،نمک، زیرہ پاؤڈر،دھنیا پسا ہوا،(دار چینی،بڑی الائچی،چھوٹی الائچی،لونگ،تیز پتہ،جائفل) پساہوا،لال مرچ اورہلدی ڈال کر پانچ سے سات منٹ پکائیں۔گرم پانی ڈال کر بیف کو گلنے تک پکائیں۔گل جانے پر آٹےکو بھون کر تھوڑے سے پانی میں ملا کر ڈال دیں اور سونف بھی ڈال دیں۔ اب بیف نہاری سرو کرنے کے لیےتیا ر ہے۔

سری پائے

اجزاء۔

بکرے کے پائے۔ چار عدد

سری۔ ایک عدد

تیل۔حسبِ ضرورت

نمک۔ بیس گرام

سرکہ۔ ایک چوتھائی کپ

سرخ مرچ۔ سترہ عدد

خشک دھنیا۔ بیس گرام

ہلدی۔ دس ملی گرام

لہسن۔ دو گڈیاں

پیاز ۔آدھا پاؤ

دہی۔ ایک پاؤ

گرم مصالحہ۔ دس گرام (پسا ہوا)

ہری مرچ۔ دو تا چار عدد (کٹی ہوئی)

ہرا دھنیا۔ ایک چوتھائی گٹھی (باریک کٹا ہوا)

ادرک۔ ایک انچ کا ٹکڑا (باریک کٹا ہوا)

پانی۔ حسبِ ضرورت

ترکیب۔

1۔سری سے مغز نکال کر باقی تمام گوشت کو الگ رکھ لیں۔

2۔پیاز کاٹیں اور اسے تیل میں تَل کر علیحدہ نکال لیں۔

3۔اب نمک، دھنیا، سرخ مرچ، لہسن کی آدھی مقدار، ہلدی اور پیاز کا مصالحہ پیس لیں۔

4۔نمک اور بقیہ لہسن کے جوئے تھوڑے سے پانی میں ملا کر رکھ لیں۔

5۔تیل میں پسا ہوا گرم مصالحہ بھونیں۔

6۔جب یہ خوب لال ہو جائے اور تیل چھوڑنے لگے تو اس میں سرکہ، گوشت مغز اور پائے ڈال دیں۔

7۔جب تھوڑا بھن جائے تو نمک اور لہسن کا پانی ڈال کر پکائیں۔

8۔پھر دہی ڈال کر بھونیں اور گلانے کے لئے پانی ڈال کر چھ سے سات گھنٹے تک ہلکی آنچ پر پکنے دیں۔

9۔تیار ہونے پر گرم مصالحہ، ہری مرچ، ہرا دھنیا اور ادرک ڈال کر سَرو کریں۔

پھینی

اجزاء۔

:بیٹرکے لئے

گھی۔ آدھا کلو

یونی پف۔ آدھا کلو

:ڈو کے لئے

میدہ ۔آدھا کلو

پانی۔ ایک کپ یا حسب ضرورت

تیل۔ فرائی کرنے کے لئے

ترکیب۔

1۔گھی اور یونی پف کو پین میں دس منٹ گرم کریں۔

2۔پھر ایک گھنٹہ ٹھنڈا ہونے کے لئے چھوڑ دیں تاکہ مکھن تیار ہوجائے۔

نوٹ: اگر مکھن سخت ہوجائے تو تھوڑا آئل ڈال کر مکھن کو نرم کر لیں۔

3۔ڈو کے لئے: میدے میں ایک کپ پانی ڈال کر ڈو گوندھ لیں۔ پانی کم یا زیادہ استعمال کیا جاسکتا ہے بس ڈو کو نرم ہونا چاہیے۔

4۔پھر ڈو کو ہاتھوں کی مدد سے گولائی میں ڈونٹ کی شکل میں گھمائیں۔

5۔اب اس پر مکھن لگائیں اور بیس منٹ کے لئے چھوڑ دیں۔

6۔پھر ہاتھوں سے گولائی میں اس طرح رول کریں کہ چار گول رولز بن جائیں۔

7۔اب رولز کو پیڑے کے سائز میں کاٹ لیں۔

8۔پھر پراٹھے کے پیڑے کی طرح کے پیڑے بنا لیں اور ایک گھنٹے کے لئے چھوڑ دیں۔

9۔پھر ہاتھوں سے بیل لیں۔

10۔کڑاہی میں تیل گرم کرکے اس میں پھینی ڈال کر فرائی کرلیں۔

11۔گرم دودھ میں ڈال کر سرو کریں۔

پین کیک

اجزاء۔

میدہ۔ ایک پیالی

چینی۔ ایک چٹکی

نمک۔ ایک چٹکی

انڈا ۔ایک عدد

دودھ یا پانی ۔ایک پیالی

آئل یا گھی۔ چار سے چھ ٹیبل سپون

ترکیب۔

میدے میں نمک ملا کر چھان لیں۔ دودھ، انڈا شامل کرکے اچھی طرح ملا لیں ۔

مکسچر نہ زیادہ گاڑھا ہو نہ پتلا، اس میں چینی بھی ڈال دیں۔

فرائنگ پین کو آئل سے اچھی طرح چکنا کر کے ہلکی آنچ پر گرم کر یں۔

درمیانے سائز کی پیالی میں آمیزہ لے کر فرائنگ پین میں ڈالیں۔

ہینڈل پکڑ کر گھماتے رہیں تاکہ آمیزہ برابر آجائے۔

ہلکی آنچ پر پکنے دیں جب کناروں سے چھوڑنے لگے تو صاف برتن میں اتارلیں۔

اس کو شہد ، مختلف قسم کے جام اور شیرے میں پکے تازہ پھلوں کے ساتھ پیش کیا جا سکتا ہے۔

اسپنش آملیٹ

اجزاء۔

انڈے کی سفیدی۔ 3 عدد

چکن۔ 250 گرام

زیتون ۔ 4 کھانے کے چمچ

موزریلا چیز۔ حسبِ ضرورت

لیموں۔ 2 عدد

لال مرچ۔ آدھا چائے کا چمچ

اوریگانو۔ آدھا چائے کا چمچ

تھائم۔ آدھا چائے کا چمچ

نمک۔ حسب ذائقہ

کالی مرچ۔ حسب ذائقہ

ہرا دھنیا، ہری مرچ اور پودینہ ۔گارنش کے لیے

ترکیب۔

انڈے کی سفیدی کو اچھی طرح پھینٹ لیں کہ اس میں ہوا بھر جائے۔

پھر اس میں لال مرچ، تھائم، اوریگانواور نمک ڈال کے مکس کریں۔

چکن کو نمک اور لیموں کے رس کے ساتھ فرائی کرلیں۔

فرائنگ پین میں تھوڑا سا تیل ڈال کے ہلکی آنچ پر گرم کریں اور اس میں مکسچر پھیلا دیں،اوپرزیتون چکن اور لیموں چھڑک کے سائیڈ بدل دیں۔

پلیٹ میں نکال لیںاور اوپر موزریلا چیز کے ٹکرے ڈال کے اسے پری ہیٹ اوون میں فل ہیٹ پر دو منٹ کیلئے اوون میں رکھیں۔

ہرا دھنیا، ہری مرچ اور پودینہ سے گارنش کرکے سرو کریں۔

الائچی لسی

اجزاء۔

تازہ دہی ۔2 کپ

دودھ۔ 1 کپ

چینی ۔حسبِ ضرورت

الائچی پاؤڈر ۔ 2 چائے کے چمچ

برف کے کیوبز۔4 سے 5

ترکیب۔

سوائے برف کے تمام اجزائے ترکیبی باہم یکجا کر لیںاور ایک مکسر میں 2 تا 3 منٹ تک بلینڈ کریں۔

پھرگلاسوں میں انڈیل کر سرو کریں۔