ظفر گوہر پر میچ فیس کا 20 فیصد جرمانہ

قائد اعظم ٹرافی فرسٹ الیون ٹورنامنٹ کے میچ میں امپائر کے فیصلے پر اعتراض کرنے پرسینٹرل پنجاب کے کرکٹر ظفر گوہر پر میچ فیس کا 20 فیصد جرمانہ عائد کردیا گیا ہے۔

پاکستان کرکٹ بورڈ (پی سی بی) کے مطابق ظفر گوہرکو اسٹیٹ بینک اسٹیڈیم کراچی میں سدرن پنجاب کے خلاف دسویں راؤنڈ کے میچ میں امپائر کے فیصلے پر اعتراض کرنے سے متعلق لیول 1 جرم کا مرتکب پایا گیا ہے۔

میچ کے دوران سینٹرل پنجاب کی پہلی اننگز میں ظفر گوہر امپائر کی جانب سے ایل بی ڈبلیو آؤٹ دئیے جانے کے باوجود کافی دیر کریز پر موجود رہے۔

آن فیلڈ امپائرز آلِ حیدراور راشد ریاض نےظفر گوہر کو پی سی بی کوڈ آف کنڈکٹ کے آرٹیکل 2.8کی خلاف ورزی کرنے پر چارج کیا۔

سینٹرل پنجاب کے کرکٹر کی جانب سے اعتراف جرم کرنے پر میچ ریفری محمد انیس نے ظفر گوہر پر میچ فیس کا 20 فیصد جرمانہ عائد کردیا۔