جمال خاشقجی کے قتل پر مبنی دستاویزی فلم کا ٹریلر جاری
  • بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جمال خاشقجی کے قتل پر مبنی دستاویزی فلم کا ٹریلر جاری

لاس اینجلس (مانیٹرنگ ڈیسک)واشنگٹن پوسٹ کے معروف صحافی جمال خاشقجی کے قتل کے پیچھے اصل محرکات سے متعلق برائن فوگل کی آنے والی دستاویزی فلم کا ٹریلر جاری کردیا گیا۔اس حوالے سے برائر کلف انٹرٹینمنٹ نے ایکشن سے بھرپور دستاویزی فلم “دی ڈیسڈینٹ” کی ریلیز کے حقوق بھی حاصل کرلیے ہیں۔برائن فوگل کی دستاویزی فلم “دی ڈیسڈینٹ” واشنگٹن پوسٹ کے سابق معروف صحافی جمال خاشقجی کے قتل سے متعلق ہے۔ فلم کمپنی نے گزشتہ روز فلم کا ٹریلر جاری کیا ہے۔اس دستاویزی فلم کا خلاصہ یہ ہے کہ اس میں جمال خاشقجی کے استنبول میں واقع سعودی قونصل خانہ میں ہونے والے قتل کے پیچھے محرکات اور دھوکہ دہی کو بے نقاب کیا گیا ہے۔خاشقجی ایک اصولی اصلاح پسند صحافی تھے جنہوں نے اپنے وطن میں ایک آزاد معاشرے کی تشکیل کی کوشش کی تھی اور آخرکار حکومت کی مخالفت کے سبب انہیں قتل کر دیا گیا۔اس فلم کی ریلیز کی کوئی خاص تاریخ مقرر نہیں کی گئی ہے، اس میں نئی فوٹیج اور متعدد معلومات پیش کی گئی ہیں جو پہلے عوام کیلئے دستیاب نہیں تھیں۔ فلم میں جن شخصیات کے انٹرویو شامل کیے گئے ہیں ان میں خاشقجی کی منگیتر ہیٹیس سنجز، اقوام متحدہ کے خصوصی نمائندہ ایگنس کالمارڈ جنہوں نے اس قتل کی تحقیقات کا آغاز کیا تھا۔ نیز، ترک پولیس، استغاثہ، سائبر سیکیورٹی کے ماہرین، عمر عبدالعزیز اور ایک نوجوان کارکن جو جمال خاشقجی کے ساتھ خفیہ طور پر تعاون کررہا تھا شامل ہیں۔اس حوالے سے فوگل نے ایک بیان میں کہا کہ جمال خاشقجی کی دوسری برسی قریب ہے تو مجھے امید ہے کہ یہ فلم ان کی یادوں کو تقویت بخشے گی اور انصاف کی فراہمی کو یقینی بنائے گی، انہوں نے کہا کہ ہمارا معاشرہ انسانی حقوق کی ظالمانہ خلاف ورزیوں پر اب آنکھیں بند نہیں کرے گا۔