شہر کے مختلف علاقوں میں عید تعطیلات کے دوران پتنگ بازی عروج پر رہی

ملتان (سٹاف رپورٹر) ضلعی حکومت اور پولیس کی عدم دلچسپی اور غفلت کے باعث عیدالفطر کی تعطیلات کے دوران پر پتنگ بازی عروج پر رہی ، اندرون شہر، پرانا شجاع آباد، گلشن مارکیٹ، نیو ملتان، شاہ رکن عالم، لیاقت آباد سمیت شہر کے مختلف علاقوں میں شہری چھتوں پر پتنگ بازی میں مصروف رہے، شہر بھر میں مختلف جگہوں پر پتنگ اور ڈور سرعام فروخت ہوتی رہی، جبکہ پتنگ اور ڈور کی خریدوفروخت آن لائن بھی جاری ہے، شہری محمد ندیم، فرحان ، زوہیب نے جنگ سے خصوصی گفتگو کرتے ہوئے کہا ہے کہ عیدالفطر کی تعطیلات کے دوران شہری بڑی تعداد میں چھتوں پر پتنگ بازی میں مصروف رہے ہیں، ضلعی حکومت اور پولیس کے دعووں کے باوجود خصوصا اندرون شہر، پرانا شجاع آباد روڈ، لیاقت آباد، نیو ملتان اور شاہ رکن عالم کالونی میں پتنگ اور ڈور سرعام فروخت ہورہی ہیں، ضلعی حکومت اور پولیس خاموش تماشائی بنی ہوئی ہے، شہر کے مختلف علاقوں میں ڈور پھرنے کے واقعات ہوئے ہیں جن علاقوں میں یہ واقعات ہوئے ہیں متعلقہ تھانے کے ایس ایچ او کے خلاف کارروائی کی جائے۔