قومی اسمبلی سیکریٹریٹ کی جانب سے پاکستان تحریک انصاف (پی ٹی آئی) کے رہنما شاہ محمود قریشی کو جوابی خط لکھ دیا گیا۔
ترجمان قومی اسمبلی سیکریٹریٹ کا کہنا ہے کہ 22 دسمبر کو پی ٹی آئی پارلیمانی لیڈر شاہ محمود قریشی کو جوابی خط لکھا، جوابی خط میں پی ٹی آئی اراکین کی ممکنہ واپسی کا خیرمقدم کیا گیا۔
جوابی خط کے مطابق پی ٹی آئی اراکین قومی اسمبلی کو استعفوں کی تصدیق کیلئے بلایا جائے گا، پی ٹی آئی کے ہر رکن قومی اسمبلی کو ذاتی حیثیت میں اپنے استعفے کی تصدیق کرنا ہوگی۔
ترجمان قومی اسمبلی سیکریٹریٹ کا کہنا ہے کہ اس سے قبل پی ٹی آئی ارکان کو 6 سے 10 جون استعفوں کی تصدیق کیلئے اسپیکر چیمبر بلایا گیا تھا، باضابطہ مدعو کرنے کے باوجود پی ٹی آئی کا کوئی رکن قومی اسمبلی استعفے کی تصدیق کیلئے نہیں آیا۔