ملک بھر میں 9 محرم الحرام کے موقع پر چھوٹے بڑے شہروں میں جلوس نکالے جا رہے ہیں، مجالس منعقد اور نوحہ خانی کی جا رہی ہے۔
کراچی میں 9 محرم الحرام کا مرکزی جلوس دن ڈیڑھ بجے نشتر پارک سے برآمد ہو گا۔
دوپہر 12 بجے کے بعد نشتر پارک میں مرکزی مجلس ہو گی اور مجلس کے بعد جلوس نشتر پارک سے برآمد ہو گا۔
جلوس کی طرف آنے والی سڑکیں اور گلیاں بند کر دی گئی ہیں جبکہ ایم اے جناح روڈ جزوی طور پر کھلا ہوا ہے، پولیس اور رینجرز جلوس کے روٹ پر موجود ہیں۔
کمانڈ اینڈ کنٹرول روم میں سی سی ٹی وی کیمروں کی مدد سے جلوس کی مانیٹرنگ کی جائے گی جبکہ بلند عمارتوں پر پولیس اور رینجرز کی نفری تعینات ہو گی۔
محکمۂ داخلہ سندھ کا کہنا ہے کہ کراچی میں 9 اور 10 محرم کو ڈبل سواری پر پابندی ہے۔
نوٹیفکیشن کے مطابق ڈبل سواری پر پابندی سے خواتین، بچے، صحافی اور قانون نافذ کرنے والے ادارے کے اہلکار مستثنیٰ ہوں گے۔
محکمۂ داخلہ سندھ کا کہنا ہے کہ اسلحے کی نمائش، ہیلی کیم اور ڈرون اڑانے پر بھی پابندی عائد ہے۔
اسلام آباد میں جلوس امام بارگاہ اثناء عشری سیکٹر جی 6 سے برآمد ہو گا۔
جلوس روایتی راستوں سے ہوتا ہوا امام بارگاہ اثناء عشری پر ہی اختتام پزیر ہو گا۔
لاہور میں نویں محرم الحرام کا مرکزی جلوس پانڈو اسٹریٹ اسلام پورہ سے برآمد ہو گیا۔
مرکزی جلوس اپنے روایتی راستے ہوتا ہوا اسلام پورہ پانڈو اسٹریٹب واپس پہنچ کر اختتام پذیر ہو گا۔
ترجمان پولیس کا کہنا ہے کہ لاہور میں 378 مجالس اور 79 عزاداری جلوسوں کو سیکیورٹی فراہم کی جا رہی ہے۔
سی سی پی او لاہور نے کہا ہے کہ مجالس اور جلوسوں کے شرکاء کے لیے فول پروف سیکیورٹی انتظامات کیے گئے ہیں۔
پشاور میں نویں محرم الحرام کا ماتمی جلوس امام بارگاہ حسینیہ ہالصدر سے برآمد ہو گیا۔
جلوس فخرعالم روڈ، کالی باڑی، چوک فوارہ سمیت روایتی راستوں سے ہوتا ہوا امام بارگاہ پر ختم ہو گا۔
جلوس کے لیے سیکیورٹی کے خصوصی انتظامات کیے گئے ہیں جبکہ جلوس کے تمام راستوں کو سیل کر دیا گیا ہے۔
کوئٹہ میں 9 محرم الحرام کا جلوس آج دوپہر میگانگی روڈ سے برآمد ہو گا۔
شہر میں 9 محرم الحرام کے جلوس کی سیکیورٹی کے پیش نظر روٹ اور اطراف میں دکانیں بند کر دی گئیں۔
پولیس کا کہنا ہے کہ جلوس کی سیکیورٹی کے لیے 2000 سے زائد اہلکار تعینات کیے گئے ہیں اور شہر میں دفعہ 144 کے تحت موٹر سائیکل کی ڈبل سواری پر پابندی ہے۔
کوئٹہ میں 9 محرم الحرام کے موقع پر موبائل فون سروس معطل ہے۔
ڈی آئی خان میں نویں محرم الحرام کی مناسبت سے مرکزی جلوس امام بارگاہ بمو شاہ سے 9 بجے برآمد ہو گیا، شہر سے آج 4 ماتمی جلوس برآمد کیے جائیں گے۔
پولیس کے مطابق شہر میں موٹر سائیکل چلانے پر مکمل پابندی عائد کر دی گئی ہے جبکہ شہر کے حساس علاقوں کو مکمل طور پر سیل کر دیا گیا ہے۔
نویں محرم اور یوم عاشور کی مجالس و جلوسوں کی مانیٹرنگ کے لیے دو کنٹرول رومز قائم کیے گئے ہیں، جبکہ ساڑھے 8 ہزار پولیس اہلکار حفاظتی اقدامات کے تحت فرائض انجام دے رہے۔
دادو میں آج 62 مجالس اور 55 ماتمی جلوس برآمد ہوں گے۔
ایس ایس پی کے مطابق ضلع بھر میں سیکیورٹی کے فول پروف انتظامات کیے گئے ہیں، 2 ماتمی جلوس انتہائی حساس جبکہ 16 حساس قرار دیے گئے ہیں۔
انہوں نے کہا کہ نویں اور دسویں محرم الحرام کے دوران موبائل نیٹ ورک بند رکھا جائے گا۔
روہڑی میں ساڑھے 500 سالہ قدیمی کربلاء معلی کا نوڈھالہ تعزیہ جلوس منڈو کھبڑ پہنچ گیا، نماز ظہرین کے بعد جلوس دوسرے مرحلے میں دوسری منزل کے لیے برآمد ہو گا۔
سکھر میں نو ڈھالہ تعزیہ کو پرسہ دینے کی کوشش میں کئی عزادار بے ہوش و زخمی ہوگئے۔
زخمیوں اور بے ہوش عزاداروں کو طبی کیمپوں میں طبی امداد دینے کاسلسلہ جاری ہے۔
تعزیے کا جلوس اپنی پہلی منزل منڈو کھبڑ کے مقام پر پہنچ کر قیام کرے گا، پولیس، رینجرز اور اسکاؤٹس کے جوان رضا کارانہ طور پر خدمات انجام دے رہے ہیں۔
پولیس کا کہنا ہے کہ آج شکارپور میں موبائل فون اور انٹرنیٹ سروس معطل ہے، امن وامان کی صورتِ حال کو بہتر بنانے کے لیے سروسز معطل کی گئی۔
پولیس نے کہا ہے کہ موبائل فون اور انٹرنیٹ سروس رات 12 بجے تک بند رہیں گی۔
بہاولپور میں نویں محرم کا شبیہ علم و ذوالجناح کا جلوس اوچ شریف میں امام بارگاہ محلہ خواجگان سے برآمد ہو گیا۔
نویں محرم کے عزاداری جلوسوں اور مجالس عزاء کی سیکیورٹی کے لیے 1650 پولیس اہلکار اور 1606 رضا کار تعینات کیے گئے ہیں۔
ڈی پی او اسد سرفراز کا کہنا ہے کہ جلوس کی سیکیورٹی کے لیے سی سی ٹی وی، ڈرون کیمرے اور جیمرز بھی نصب ہیں۔
پاکپتن میں 9 ویں محرم کے 14جلوس اور 35 مجالس عزاء منعقد ہوں گی۔
پولیس ترجمان کا کہنا ہے کہ جلوس و مجالس کے موقع پر سیکیورٹی کے فول پروف انتظامات کیے گئے ہیں۔