کراچی میں اورنگی ٹاون کے علاقے پیر آباد میں مبینہ پولیس مقابلے میں بچی کو زیادتی کے بعد قتل کرنے والا ملزم ہلاک ہوگیا جبکہ ایک فرار ہوگیا ْ
ایس پی اورنگی عابد علی بلوچ کے مطابق پیر آباد پولیس نے ملزمان کی موجودگی کی اطلاع پر کٹی پہاڑی کے قریب کارروائی کی اس دوران ملزمان نے پولیس پر فائرنگ کردی پولیس کی جوابی فائرنگ سے ملزم ہلاک اور ایک فرار ہوگیا۔
فرار ہونے والے ملزم کی گرفتاری کے لئے کارروائی کی جارہی ہے۔ ایس پی اورنگی کے مطابق ملزمان کی فائرنگ سے انچارج طوری بنگش چوکی عمران گجر بھی زخمی ہوئے ہیں ۔
ایس پی اورنگی کے مطابق ہلاک ملزم کی شناخت حمزہ کے نام سے ہوئی ہے ملزم نے چند دن قبل منگھوپیر میں 6سالہ بچی سدرہ کو زیادتی کے بعد قتل کردیا تھا اور بچی کی لاش کو خالی پلاٹ میں پھنک دیا تھا۔