صوبے کے تعلیمی اداروں کو سدھارنے کے لئے وزیراعلیٰ سید مراد علی شاہ کی جانب سے لگائی گئیایمرجنسی مکمل ناکامی سے دوچار ہوگئی ہے اور صورتحال یہاں تک جا پہنچی ہے کہ سابق وزیر اعلیٰ سید قائم علی شاہ کے وقت میں جو سندھ اسمبلی نے تعلیم کا مفت اور لازمی ایکٹ منظور کیا تھا اس پر چار سال گزرنے کے باوجود عملدرآمد نہیں ہوسکا ہے اور اس ایکٹ کے اطلاق کے لئے رولز بھی نہیں بنائے جاسکے ہیں ۔
اس ایکٹ کے مطابق پانچ سال سے سولہ سال تک کے تمام طلباء و طالبات کے لئے مفت اور لازمی تعلیم کا بندوبست کرنا صوبائی حکومت کی ذمہ داری تھی اور اس میں نجی تعلیمی اداروں کو دی جانے والی گرانٹ بھی شامل تھی۔
اسے موجودہ وزیراعلیٰ کی ایمرجنسی نے پس پشت ڈال دیا ہے اور پورا محکمہ تعلیم ایڈہاک بنیاد پر کام کررہاہے جس کا ایک ثبوت یہ ہے کہ اس وقت کالجوں کے لئے ڈائریکٹر جنرل کا عہدہ خالی ہے اور کراچی کے اسکولوں کی نظامت کے بیشتر عہدے بھی خالی پڑے ہوئے ہیں بلکہ نظامت تعلیم کا اپنا مستقل دفتر بھی کوئی نہیں ہے۔