ناروے کے دارالحکومت اوسلو میں پاکستان کے سفارتخانے میں سرمایہ کاری کے حوالے سے ایک تقریب منعقد ہوئی۔ تقریب سے رکن پنجاب اسمبلی رانا محمودالحسن، سفیر پاکستان رفعت مسعود اور مسلم لیگ ن برطانیہ کے سینئرنائب صدر رانا بشارت علی خان نے خطاب کیا۔
اس موقع پر ناروے میں پاکستان کے اعزازی قونصلر برائے سرمایہ کاری راجہ ناصر حسین بھی موجود تھے۔
ایم اپی اے رانا محمود الحسن نے خطاب کرتے ہوئے کہا کہ وہ نارویجن سرمایہ کاروں کو پاکستان میں سرمایہ کاری کی طرف راغب کرنے آئے ہیں اور کیج فش فارمنگ اور شپنگ کے حوالے سے ناروے سمیت اسکینڈے نیویا کی مہارت اور تجربات سے استفادہ کرنا چاہتے ہیں۔
انہوں نے کہا کہ پاکستان میں سرمایہ کاری کے بہت سے مواقع موجود ہیں،ان کے وفد نے ناروے میں فش فارمنگ کے بارے میں متعلقہ کمپنیوں کے عہدیداروں سے ملاقاتیں کی ہیں اور فیری سروس کے حوالے سے بات چیت کے لیے وہ فن لینڈ جائیں گے۔
انہوں نے پاکستان میں نارویجن سرمایہ کاری کے حوالے سے سفیر پاکستان محترمہ رفعت مسعود اور ناروے میں پاکستان کے اعزازی قونصلر برائے سرمایہ کاری راجہ ناصر حسین کے کاوشوں کو سراہا۔
اس سےقبل سفیرپاکستان رفعت مسعود نے وفد کا تقریب کے شرکاء سے تعارف کروایا اور یہ بھی بتایا کہ ناروے میں نارویجن پاکستانیوں کی محنت اور دیانتداری کی وجہ سے پاکستان کا بڑا وقار ہے اور پاکستانیوں کو عزت کی نگاہ سے دیکھا جاتا ہے۔
انہوں نے بتایاکہ ہم اس وقت پاکستان میں ممکنہ نارویجن سرمایہ کاری کے حوالے سے بہت سے مجوزہ منصوبوں پر کام کر رہے ہیں۔
اس موقع پر مسلم لیگ ن برطانیہ کے سینئر نائب صدر رانا بشارت علی خان نے ناروے میں پاکستان کے سفارت خانے کی کارکردگی کی تعریف کی اور کہا کہ ناروے میں پاکستانی کمیونٹی میں سفیر پاکستان کے بارے میں اچھے تاثرات پائے جاتے ہیں۔
انہوں نے بتایاکہ وہ اس وقت برما کے روہنگیا مسلمانوں کے ساتھ ہمدردی حاصل کرنے کے لیے یورپ میں ایک آگاہی مہم پر کام کر رہے ہیں۔
انہوں نے اپنے خطاب میں مظلوم کشمیریوں اور فلسطینی مسلمانوں سے بھی گہری ہمدردی کا اظہار کیا۔
ناروے میں پاکستان کے اعزازی قونصلر برائے سرمایہ کاری راجہ ناصر حسین نے نمائندہ ’جنگ‘ کو بتایا کہ اس وقت ناروے کی بہت سی سرمایہ کار فرموں کے ساتھ متعدد مجوزہ منصوبوں پر کام ہو رہا ہے اور ان کوششوں کے جلد مثبت نتائج برآمد ہوں گے۔
تقریب میں مسلم لیگ ن ناروے کے چیف آرگنائزر نذیر خالد بٹ، جنرل سیکریٹری منصور عادل، مسلم لیگ ن ناروے کے سینئر نائب رہنما چوہدری رفاقت علی (طاہر)، پاک ناروے فورم کے چوہدری اسماعیل سرور، سماجی شخصیات سید طارق شاہ، خالد محمود گجر اور سلطان اعوان اور نارویجن پاکستانی کمیونٹی کے دیگر افراد نے بھی شرکت کی۔
دریں اثناء ناروے میں پاکستان کی سفیر رفعت مسعود نے مہمان وفد کے اعزاز میں اپنی رہائش گاہ پر عشائیہ کا اہتمام بھی کیا۔