وزیراعلیٰ خیبرپختونخوا پرویز خٹک نے کہا ہے کہ عمران خان کے خلاف کیس میں سپریم کورٹ کے فیصلے نے پی ٹی آئی چیئرمین کی ایمانداری اور شفاف قیادت پر مہر ثبت کردی ہے۔
نوشہرہ جہانگیرہ نڑئی میں جلسے سے خطاب اور میڈیا سے گفتگو میں پرویز خٹک نے کہا کہ عمران خان کے خلاف سپریم کورٹ میں جعلی کیس لے جانے والے مخالفین کو منہ کی کھانی پڑی ۔
ان کا مزید کہناتھا کہ جہانگیرترین کے فیصلے پر کوئی ٹیکنکل غلطی ہوئی ہوگی، جس کے خلاف وہ ضرور نظر ثانی کی اپیل کریں گے۔
انہوں نے کہا کہ حدیبہ پیپرز ملز کے فیصلے پر ہمارے تحفظات ہے، افسوس سے کہنا پڑتا ہے کہ نیب نے اپنا کیس صحیح طریقے سے پیش نہیں کیااور ایک کرپٹ خاندان کو بچانے کی کوشش کی ۔
پرویز خٹک نے کہا کہ اس وقت حکومت نام کی کوئی چیز نہیں ہر طرف افرا تفری ہے،بد اعتمادی ہے پتہ نہیں چلتا کہ کون کیا فیصلے کررہا ہے،جب ملک میں ایسی صورت حال ہو تو انتخابات جلد ہونے چاہیے،اگر ایسا نہ ہوا تو کسی بڑے نقصان کا خدشہ ہوسکتا ہے۔
خیبر پختونخوا اسمبلی توڑنے کے حوالے سے پرویز خٹک نے کہا کہ عمران خان جو بھی فیصلہ کرے گا، ہم تیار ہیں، چاہے وہ اسمبلیاں توڑنا ہی کیوں نہ ہو، میں ہر قسم کی چیز کے لیے تیار ہوں۔
وزیراعلیٰ خیبرپختونخوا نے کہا کہ 2018 کے انتخابات میں عمران خان اس ملک کے وزیر اعظم ہوں گے، چاروں صو بوں کے عوام نے یہ فیصلہ دیدیا ہے، اب اس ملک سے چوروں اور لٹیروں کی چھٹی ہوگئی ہے۔