بھارتی اپوزیشن جماعت کانگریس کے سابق صدر راہول گاندھی نے کہا ہے کہ وزیراعظم نریندر مودی قوم کو بتائیں امریکی صدر سے کیا بات کی تھی؟
سماجی رابطے کی ویب سائٹ ٹوئٹر پر جاری بیان میں راہول گاندھی نے کہا کہ اگر امریکی صدر کا کشمیر پر ثالثی کا بیان درست ہے تو نریندر مودی نے بھارت کے مفاد اور شملہ معاہدے سے انحراف کیا۔
کانگریس کے سابق صدر وزارت خارجہ پر برس پڑے اور کہا کہ کمزور تردید سے کچھ نہیں ہوگا، وزیراعظم مودی کو خود قوم کو حقائق بتانا ہوں گے۔
راہول گاندھی کا کہنا تھا کہ نریندر مودی بتائیں کہ ان کے اور امریکی صدر ڈونلڈ ٹرمپ کے درمیان آخر طے کیا پایا تھا؟