برازیل کے اسٹار فٹبالر نیمار نے اپنی قومی ٹیم کی جانب سے کھیلتے ہوئے ایک اور اعزاز حاصل کرلیا۔
نیمار جونیئر ایک باصلاحیت کھلاڑی ہیں اور اپنے بہترین کھیل کی وجہ سے ہی عالمی شہرت یافتہ میسی اور کرسٹیانو رونالڈو کے ہم پلہ سمجھے جاتے ہیں۔
نیمار کلب فٹبال کھیلنے کے ساتھ ساتھ برازیل کی بین الاقوامی ٹیم کے لیے بھی دستیاب ہیں تاہم آج انہوں نے اپنی قومی ٹیم کی جانب سے کھیلتے میچز کی سنچری مکمل کرلی۔
برازیلین ٹیم اس وقت سنگاپور میں موجود ہے جہاں اس کا مقابلہ افریقی ٹیم سینگال سے ایک دوستانہ میچ میں ہوا جو 1-1 سے ڈرا ہوگیا۔
اس میچ میں نیمار کوئی گول اسکور کرنے میں تو ناکام رہے تاہم 100ویں مرتبہ برازیل کی نمائندگی کرنے پر انہیں نیا اعزاز حاصل ہوگیا۔
نیمار 100 میچوں برازیل کی نمائندگی کرنے والے ساتویں اور کم عمر ترین فٹبالر بن گئے۔
انہوں نے 5 مرتبہ کی عالمی چیمپیئن ٹیم کی نمائندگی کرتے ہوئے 61 گول بھی اسکور کیے برازیل کی جانب سے تیسرے سب سے زیادہ گول اسکور کرنے والے کھلاڑی ہیں۔
واضح رہے کہ اس فہرست میں عظیم فٹبالر پیلے پہلے نمبر پر ہیں جو 92 میچز میں برازیل کی جرسی پہن کر میدان میں اترے جنہوں نے 77 گول اسکور کیے جبکہ دوسرے نمبر پر ایک اور عظیم فٹبالر رونالڈو ہیں جو برازیل کے لیے 98 میچز میں 62 گول اسکور کیے۔
ساتھ ہی نیمار نے برازیل کی نمائندگی کرنے میں رونالڈو کو بھی پیچھے چھوڑ دیا۔
نیمار اولمپک 2016 میں گولڈ میڈل جیتنے والی برازیل ٹیم کا حصہ رہے ہیں لیکن ساتھ انہیں اپنے کیریئر میں کئی مشکلات کا سامنا بھی کرنا پڑا ہے۔
فٹبال ورلڈ کپ 2014 کے دوران کولمبیا کے خلاف کوارٹر فائنل میں وہ کمر کی انجری کا شکار ہوگئے تھے جس کی وجہ سے وہ سیمی فائنل میں ٹیم کا حصہ نہ بن سکے۔
اسٹار کھلاڑی کی غیر موجودگی کا جرمنی نے بھرپور فائدہ اٹھایا اور اسے ہوم گراؤنڈ میں 1-7 کی عبرتناک شکست دے دوچار کیا تھا۔
اس کے بعد روس میں 2018 میں ہونے والے عالمی کپ میں انہوں نے اپنی ٹیم کے لیے 2 گول اسکور کیے لیکن ان کی ٹیم کو کوارٹر فائنل میں بیلجیئم کے ہاتھوں شکست کا منہ دیکھنا پڑا۔